АҚШ президенти Доналд Трамп Шотландиядаги “хусусий ташрифи” давомида ўзининг уч асосий устувор йўналишини уйғунлаштирди — голф, шахсий бизнес манфаатлари ва глобал сиёсат.
Трамп Тёрнберри ва Балмедиедаги ўзига тегишли голф курортларида нафақат дам олди, балки уларни фаол реклама қилди. Айнан шу курортларда у муҳим матбуот анжуманлари ва учрашувлар ўтказди. Айниқса, Европа Комиссияси раҳбари Урсула фон дер Ляйен ва Британия бош вазири Кейр Стармер билан бўлган учрашувлар алоҳида эътиборга молик.
Президент ташриф чоғида АҚШ ва Европа Иттифоқи ўртасида тарихдаги энг йирик савдо битимларидан бирини эълон қилди. Келишувга кўра, Европа миллиардлаб долларлик АҚШ энергетикаси ва ҳарбий техникасини харид қилади ҳамда Америка иқтисодиётига сармоя йўналтиради. Европа маҳсулотларига эса АҚШда 15 фоизлик тариф жорий қилинади — бу Трамп илгари таҳдид қилган 30 фоизлик бождан анча қулай.
Трамп ва Стармер ўртасидаги музокараларда Ғазо сектори бўйича гуманитар масалалар муҳокама қилинди. Трамп, Бош вазирнинг даъватига жавобан, АҚШнинг Буюк Британия ва Европа билан ҳамкорликда Ғазога озиқ-овқат етказиш марказларини ташкил этишини билдирди.
Шунингдек, Трамп Украина-Россия можаросига оид позициясини кескин ўзгартирди. У эндиликда Россиядан сулҳга келиш учун атиги 10-12 кун вақт беришини айтди. "Кутишнинг фойдаси йўқ", деди у.
Бу сафар давомида Трамп ўз сиёсий позициясини мустаҳкамлаш, тижорий манфаатларини тарғиб қилиш ва халқаро саҳнада таъсирини ошириш имконини қўлга киритди. Айнан шундай услуб — сиёсатни шахсий бренд билан уйғунлаштириш — Трамп сиёсатининг ўзига хос жиҳатидир.
«Замин»ни Telegram’да ўқинг!
