Азизлар, бугун 9 август. Доналд Трампнинг урушни тўхтатиш бўйича Путинга берган энг охирги муддати якунига етди. Биз сизга муҳлат тугаганини эслатишга ваъда бергандик. Ўша видеомизда тахмин қилганимиздек, Россияга қарши ҳеч қандай санкция жорий қилинмади. Лекин Трамп Путин билан кўришишга келишиб олди. Бу учрашувда Зеленский ҳам қатнашиши мумкин. Икки президент Америка ўз вақтида Россиядан сотиб олган Аляскада кўришадиган бўлди. Бу учрашув урушни тугатиши мумкин.
Нега Аляска?
Демак, Трамп ва Путин 15 август куни Аляскада учрашади. Бу ҳақда биринчи бўлиб Трамп эълон қилганига қараганда, учрашув жойини унинг ўзи танлаган. Россия президенти аввалроқ БАА президенти билан учрашув вақтида бу давлатни «Трамп билан учрашиш учун қулай жой» деганди. Эсингизда бўлса, Украина ва Россия илк асирлар алмашинувини ҳам шу давлатда ўтказганди. Бироқ Россия ортиқ музокараларда кучли позицияда эмасга ўхшайди, чунки учрашув Путин хоҳлаган БААда эмас, Трамп хоҳлаган Аляскада бўлади.
Америкаликлар учрашув учун нега Аляскани танлашгани тушунарли. Биринчидан, бу икки давлат чегарасида жойлашган штат. Иккинчидан, америкаликлар Путинга ота-боболари Аляскани Россиядан сотиб олганини эслатмоқчи бўлган кўринади.
Айтганча, Трамп ўзига яқинроқ бўлсин деб Аляскани танламаганини харитадан кўриб олишингиз мумкин. Трамп Американинг нариги чеккасидан Канада осмони узра учиб Аляскага етиб боради. Путин ҳам олис йўл босади, лекин Аляска Россиянинг шундоққина чегарасида жойлашган. Масалан, Россиянинг Анадир шаҳридан Аляскагача атиги 360 км. Беринг бўғозида эса икки давлатни 86 км сувлик ажратиб туради. Шу сабаб учрашув жойи сифатида Аляска танланганини сиёсий қарор дейиш мумкин.
Путин ва суҳбатлар
Охирги кунларда Владимир Путиннинг бир иши эътиборни тортди. У жуда кўп давлат раҳбарларига телефон қилиб негадир Стивен Уиткофф билан учрашув тафсилотлари ҳақида гапириб берди. Путин аввалига ЖАР президенти Сирил Рамафосага, кейин Ўзбекистон, Қозоғистон, Беларус президентларига, сўнг Хитой раиси Си Жинпинг ва Ҳиндистон бош вазири Модига телефон қилиб, Трампнинг вакили билан учрашув ҳақида айтиб берди. Орада Россия хавфсизлик кенгаши доимий аъзолари иштирокида йиғилиш ҳам ўтказди.
Путин нега Уиткофф билан учрашув тафсилотини бунчалик кўп одамга айтиб бергани қизиқ. Бу давлатлар Россиянинг муҳим иқтисодий ҳамкорлари экани инобатга олинса, балки Путин Трамп билан келиша олмаган тақдирда қўйилажак иккиламчи санкцияларни муҳокама қилгандир.
Демак, дунёмиз тинчликка яқинлашиши учун реал имконият пайдо бўлди. Бугундан бошлаб ушбу учрашувга кўпроқ тўхталамиз.
Ўткир Жалолхонов тайёрлади
«Замин»ни Telegram’да ўқинг!
