Вашингтондаги учрашув Украина учун ҳал қилувчи бўлиши мумкин

Душанба куни Оқ уйда бўладиган учрашув Украина ва Европа хавфсизлиги учун катта аҳамият касб этмоқда. Мутахассислар бу музокаралар ўтган ҳафтадаги Трамп–Путин саммитидан ҳам муҳимроқ бўлиши мумкинлигини айтмоқда.

Украина президенти Владимир Зеленский Вашингтонга Европа етакчилари билан бирга келди. Уларнинг мақсади – АҚШ президенти Доналд Трампга тинчлик келишуви Украинанинг иштирокисиз тузилмаслиги ва унга қатъий хавфсизлик кафолатлари қўшилиши зарурлигини тушунтириш.

Зеленский ҳудуддан воз кечиш ниятида эмаслигини таъкидламоқда. Ғарб эса Украина учун НАТОга ўхшаш ҳимоя механизми ишлаб чиқилиши мумкинлигини билдирган. Бу келажакда Россия ҳужумларининг олдини олишга хизмат қилади.

Шу билан бирга, Россия Донбасс ва Қримни ўз назоратида сақлашга қатъий интилмоқда. Агар Украина ҳудуддан воз кечишга мажбур бўлса, бу мамлакат хавфсизлигини янада заифлаштириши мумкинлиги ҳақида огоҳлантиришлар мавжуд.

Ҳарбий экспертлар эса, ҳатто уруш тўхтатилса ҳам, Россия кучларини қайта тиклаб, янги ҳужумга тайёрланиши эҳтимолдан холи эмаслигини айтмоқда. Шу сабабли Вашингтондаги музокаралар нафақат урушни тугатиш, балки Украина учун узоқ муддатли кафолатларни таъминлашда муҳим синов бўлмоқда.