АҚШ президенти Доналд Трамп саломатлиги билан боғлиқ масалалар туфайли яна кенг жамоатчилик эътиборида қолмоқда. The Daily Beast ёзишича, унинг қўлида қўлланилган тонал кремнинг қалин қатлами яққол кўзга ташланган. Айтилишича, президент айнан шу восита билан қўлидаги кўкарган жойларни ниқоблаётган бўлиши мумкин.
22 август куни Вашингтонда ўтган «The People’s House» тадбирида 79 ёшли Оқ уй раҳбари иштирок этди. Олинган суратларда эса унинг ўнг қўли макияж билан қоплангани, крем эса табиий тери рангидан ажралиб тургани яққол кўринган.
Кузатувчилар фикрига кўра, Трамп тадбир давомида қўлини чап қўли билан беркитишга ҳаракат қилган. Бироқ омма олдидаги чиқиш пайтида бу ҳолат янада кўзга ташланиб, журналистлар орасида қизғин муҳокамаларга сабаб бўлди.
Бундан аввал ҳам президентнинг қўли бир неча марта эътибор марказига чиққан эди. Оқ уй бу ҳолатни кўп марта қўл сиқиш оқибати ва юрак-қон томир касалликларининг олдини олиш учун мунтазам равишда аспирин қабул қилиши билан изоҳлаганди.
Оқ уй матбуот котиби Кэролайн Левиттнинг таъкидлашича, «Президент Трамп ҳар куни минглаб америкаликлар билан кўришади ва тарихдаги кўплаб давлат раҳбарларига қараганда кўпроқ қўл сиқишади. Унинг халққа хизмат қилишга садоқати ўзгармаслигича қолмоқда».
Шу билан бирга, июль ойида шифокорлар Трампга сурункали веноз етишмовчилик ташхисини қўйишгани хабар қилинган. Бу эса кексалар орасида кўп учрайдиган ҳолат бўлиб, қон томирлардаги шиш ва доғларни изоҳлаши мумкин.
Бироқ Оқ уй расмийлари сўнгги ойларда журналистларнинг саломатлик режаси ва даволаш жараёни ҳақидаги саволларига аниқ жавоб бермаяпти.
Эслатиб ўтамиз, баҳор мавсумида доктор Шон Барбабелла Трампнинг анъанавий тиббий кўрик натижаларини эълон қилиб, унинг соғлиғини «жисмоний ва ақлий жиҳатдан аъло ҳолатда» деб баҳолаган эди. Шунга қарамасдан, охирги ойларда олинган суратлар ва оммавий чиқишлар президентнинг саломатлиги ҳақида мунтазам равишда янги саволларни туғдирмоқда.
«Замин»ни Telegram’да ўқинг!
