Россия Федерацияси президенти Владимир Путиннинг Хитойга ташрифи арафасида Пекин томонлари учун кутилмаган янгилик маълум қилинди. Бу ҳақда Хитойнинг Sohu нашрида хабар берилди.
Манбанинг қайд этишича, гап «Ростех» давлат корпорацияси раҳбари Сергей Чемезов томонидан эълон қилинган баёнот ҳақида бормоқда. Унинг сўзларига кўра, Россия расмийлари Хитойга авиамоторлар етказиб беришга тайёр эканини билдиришган. Бу эса кўплаб таҳлилчилар фикрича, Пекин учун ҳақиқий «сюрприз» бўлди. Чунки Хитой томони бундай совғани кутмаётганди.
Айнан шу хабар Путин ташрифининг дипломатик аҳамиятини янада оширди. Чунки ҳарбий-саноат соҳасидаги ҳамкорлик нафақат икки давлат муносабатларида янги босқични англатади, балки глобал геосиёсий мувозанатга ҳам таъсир кўрсатиши мумкин.
Маълумотларга кўра, ҳафта охирида Владимир Путин расмий ташриф билан Хитойга йўл олади. Унинг сафар дастурида тўрт кунлик тадбирлар белгиланган. Жумладан, 31 август — 1 сентябрь кунлари Тянцзин шаҳрида Шанҳай Ҳамкорлик Ташкилоти саммити бўлиб ўтади.
Шундан сўнг, Пекинда Иккинчи жаҳон урушидаги ғалабага бағишланган йирик ҳарбий парад ташкил этилиши режалаштирилган. Таҳлилчиларнинг фикрича, ушбу ташриф ва унга ҳамоҳанг совға икки давлат ўртасидаги муносабатларни янги стратегик босқичга олиб чиқиши мумкин.
Шу тариқа, Путиннинг Хитойга ташрифи ортидан нафақат сиёсий, балки иқтисодий ва ҳарбий соҳада ҳам муҳим янгиликлар кутилмоқда. Бу эса халқаро ҳамжамият диққатини янада кучайтиради.
«Замин»ни Telegram’да ўқинг!
