1-сентябрдан Техасда янги қонун кучга киради. Унга кўра, Хитой, Россия, Эрон ва Шимолий Корея фуқаролари ҳамда компаниялари энди бу штатда уй, ер ёки бошқа мулк сотиб ололмайди. Улар узоқ муддатли ижарага ҳам ҳуқуқсиз.
Қонун хавфсизлик сабабли жорий этилди. Расмийлар айтишича, бу давлатларнинг ҳукуматлари АҚШга қарши босим ўтказиши ва зарарли таъсир кўрсатиши мумкин. Шунинг учун Техас ўзини ҳимоя қилишга ҳаракат қилмоқда.
Аммо кўпчилик бу қарорни танқид қилди. Хитойлик муҳожирлар ва ҳуқуқшунослар уни “адолатли эмас” ва “камситувчи” деб атамоқда. Баъзи сиёсатчилар ҳам бу қонун бизнесга зарар етказишини айтмоқда.
Судларга ҳам мурожаат қилинган, лекин ҳозирча қонун ўз кучида қолмоқда. Мутахассислар бу масалани штатлар эмас, балки бутун мамлакат даражасида ҳал қилиш кераклигини таъкидламоқда.
Техасдаги чеклов АҚШдаги катта жараённинг бир қисми. Охирги йилларда бошқа штатлар ҳам худди шундай қонунларни қабул қилмоқда. Бу эса АҚШ билан Хитой ўртасида кескинлик ортаётганини кўрсатади.
«Замин»ни Telegram’да ўқинг!
