Эрон ҳукумати россиялик фуқаролар учун кутилмаган тарзда визалар олиш тартибини қатъийлаштирди. Энди россияликлар мустақил равишда ариза топширолмайди — визалар фақат Россиядаги сайёҳлик компаниялари билан ҳамкорлик қиладиган Эрон туроператорлари орқали берилади. Бу ҳақда Россия Туроператорлари ассоциацияси маълум қилди.
Эроннинг Москвадаги элчихонаси таъкидлашича, ушбу чоралар Яқин Шарқ минтақасидаги кескин вазият билан боғлиқ. Асосий мақсад — мамлакатга “номақбул шахслар”нинг кириб келишининг олдини олиш.
Янги чекловлар Эрон ва Исроил ўртасида 12 кун давом этган қуролли тўқнашувдан сўнг пайдо бўлди. Шу давр мобайнида айрим юқори лавозимли эронлик амалдорлар Россияни Исроилга маълумот етказганликда айблаб чиқишди.
Мутахассислар фикрича, бундай қарор икки давлат муносабатларида совуқлик келтириб чиқариши мумкин. Шу билан бирга, россиялик сайёҳлар учун Эронга сафар қилиш жараёни аввалгига нисбатан анча мураккаблашади.
Эрон расмийлари эса янги тартиб мамлакат хавфсизлигини таъминлаш ва ташқи таҳдидларни олдини олиш йўлида зарур қадам сифатида баҳоланмоқда.
«Замин»ни Telegram’да ўқинг!
