Оқ уй ва АҚШнинг кўплаб давлат идораларида байроқнинг яримга туширилгани ижтимоий тармоқларда кенг муҳокамаларга сабаб бўлди. Айниқса, Президент Дональд Трампнинг “вафот этгани” ҳақида тарқалган миш-мишлар фонида бу суратлар янада тезкор тарқалди ва одамлар орасида турли гумонларни уйғотди.
Аслида эса байроқнинг ярим ҳолатда осилиши мутлақо бошқа воқеа билан боғлиқ эди. Трамп 27 август куни Миннеаполисдаги католик мактаби ва черковида содир бўлган қонли отишма қурбонлари хотирасига ҳурмат сифатида давлат байроқларини ярмигача тушириш ҳақида қарор қабул қилган эди. Унга кўра, 31 август куни қуёш ботгунига қадар барча федерал муассасаларда, ҳарбий базаларда, элчихоналар ва консулликларда байроқ шу ҳолатда ҳилпиратилади.
Ресми баёнотга кўра, мазкур отишмада икки киши ҳалок бўлган, 17 киши, жумладан 14 бола яраланган. Жиноятчи сифатида 20 ёшли Робин Уэстман танилган бўлиб, полиция уни ўз жонига қасд қилганини маълум қилди.
Шу билан бирга, байроқнинг яримга туширилиши Трамп ҳақидаги турли овозаларни янада кучайтирди. 30 август куни ижтимоий тармоқларда унинг “вафот этгани” ҳақидаги хабарлар тўлқин каби тарқалди. Бироқ, расмий манбалар буни рад этди. “Axios” нашри хабарчисининг таъкидлашича, Трамп тирик ва унинг соғлиги барқарор. Унинг айтишича, президент кортежи йўлга чиқишидан олдин Оқ уйда оқ поло кўйлак ва қизил “Make America Great Again” қалпоқда кўринган.
Трамп соғлиғига оид саволлар аввалроқ ҳам кўтарилганди. Июль ойида Оқ уй унинг оёқларида шиш пайдо бўлишига сабаб бўладиган сурункали веноз етишмовчиликка дуч келганини тасдиқлаган. Расмий маълумотда айтилишича, бу касаллик хавфли эмас, аммо томирларда босим ошиши ва ошқозон муаммоларини келтириб чиқариши мумкин. Ижтимоий тармоқларда эса Трампнинг оёқлари шишгани акс этган суратлар тарқалиши ортидан турли тахминлар пайдо бўлган эди.
Шу тариқа, Америка байроғи яримга туширилиши бир томондан қурбонларни хотирлаш билан боғлиқ бўлса, иккинчи томондан президентнинг соғлиғи ҳақидаги овозаларни янада жонлантирди. Мутасаддилар эса бу хабарларнинг асоси йўқлигини ва Трампнинг соғлиги ёмонлашмаганини қатъий равишда таъкидлашмоқда.
«Замин»ни Telegram’да ўқинг!