1 сентябрдан бошлаб Москва шаҳри ва Москва вилоятида хорижий фуқароларни миграция ҳисобига олишнинг янги ва замонавий тажриба лойиҳаси ишга тушди. Бу ҳақда Москва кўп функцияли миграция маркази (ММК) расман маълум қилди.
Янги тажриба доирасида Ўзбекистон, Тожикистон, Қирғизистон, Арманистон, Қозоғистон, Грузия, Озарбайжон, Молдова ва Украина фуқаролари учун “Amina” мобил иловасидан фойдаланиш мажбурий этиб белгиланмоқда. Бу инновацион дастур хорижий фуқароларга ўз яшаш манзили ва унинг ўзгариши ҳақида ички ишлар органларига масофадан туриб маълумот бериш имкониятини беради.
Рўйхатдан ўтиш жараёнида ҳар бир хорижий фуқаро шахсий мобил телефонига “Amina” иловасини ўрнатиши шарт. Авторизация хорижий фуқаролик картаси ёрдамида амалга оширилади, агар у мавжуд бўлмаса, паспорт маълумотлари орқали кириш имконияти ҳам тақдим этилган.
Илова геолокация маълумотларини Россия Ички ишлар вазирлигига автоматик тарзда узатади. Агар уч иш куни давомида фуқаро тизимда ҳаракат кўрсатмаса, у миграция маркази реестридан автоматик равишда чиқарилади. Шу билан бирга, мониторинг қоидаларини бузган шахслар “Кузатувдаги шахслар реестри”га киритилиши мумкин.
ММКнинг маълумотига кўра, ушбу тажриба лойиҳаси амалдаги миграция ҳисобига олиш тартибига альтернатива сифатида синов тариқасида жорий қилинмоқда. Бу замонавий тизим хорижий меҳнат муҳожирларининг ҳисобини осонлаштириш, уларнинг ҳуқуқий ҳолатини назорат қилиш ва масофадан самарали мониторингни таъминлаш мақсадида ишлаб чиқилган.
«Замин»ни Telegram’да ўқинг!
