Индонезиянинг Ява оролининг шарқида жойлашган Семеру вулқони яна фаоллик кўрсатди. Антара News агентлигининг хабар беришича, вулқон бир кунда икки марта отилган ва маҳаллий аҳоли орасида хавотир уйғотган.
Маълумотларга кўра, биринчи портлаш маҳаллий вақт билан 05:01 да содир бўлган ва тахминан 140 сония давом этган. Аммо бу жараён визуал равишда кузатилмаган. Орaдaн кўп вақт ўтмай, соат 09:28 да яна бир кучли отилиш қайд этилди. Бу сафар портлаш 145 сония давом этган ва вулқондан отилган қора кул 500 метр баландликка кўтарилиб, жанубий-шарқий томонга йўналган.
Маҳаллий расмийлар билдиришича, Семеру вулқони ҳозирда ҳам “2-огоҳлантириш” даражасида турибди. Шунинг учун вулқон чўққисидан 8 километр узоқликда жойлашган Бесук Кобокан атрофида барча турдаги фаолият қатъиян тақиқланган. Бу эса аҳолининг хавфсизлигини таъминлаш учун жорий қилинган қўшимча чоралардан бири ҳисобланади.
Индонезия дунёдаги энг кўп фаол вулқонларга эга мамлакат сифатида танилган. Мамлакат “Тинч океани олов ҳалқаси” деб аталадиган геологик зонанинг марказида жойлашган. Бу ҳудудда кучли зилзилалар, тўфонлар ва вулқон фаолиятлари тез-тез содир бўлиб туради. Айни пайтда Индонезияда 130 дан ортиқ фаол вулқон мавжудлиги қайд этилган.
«Замин»ни Telegram’да ўқинг!
