АҚШ президенти Доналд Трамп 3 сентябр куни Вашингтонда бўлиб ўтган муҳим учрашувда янги сайланган Полша раҳбари Карол Навроцкий билан мулоқот қилиб, мамлакатнинг Европа марказидаги ҳарбий мавқеи ҳақида муҳим баёнот берди. Унга кўра, Америка ўз қўшинларини Полшадан олиб чиқиш ниятида эмас, аксинча, зарурат бўлса, бу ердаги иштирокини янада кучайтириши мумкин.
Оқ уй раҳбарининг таъкидлашича, Полша АҚШ учун ҳар доим ишончли ҳамкор бўлиб келган ва бундай стратегик шериклик Вашингтон учун жуда муҳим. «Биз Полшани ҳеч қачон хавфсизлик масаласида ёлғиз қолдирмаймиз. Агар поляклар хоҳласа, мамлакатдаги ҳарбий қувватимизни янада оширишга ҳам тайёрмиз», — деди Трамп.
Президент шунингдек, икки давлат ўртасидаги муносабатлар тарихан доим мустаҳкам бўлганини эслатиб ўтди. Бироқ у ҳозирги алоқаларни «ҳаммадан ҳам яхшироқ ва энг ишончли давр» сифатида баҳолади.
Полша президенти Карол Навроцкий учрашув якунларини юқори баҳолар экан, қуйидагича фикр билдирди: «Трамп бизга хавфсизлик бўйича кафолат берди. Бу Полша учун жуда катта муваффақият. Биз ҳарбий соҳадаги иттифоқчилик муносабатларимизни янада мустаҳкамлашга келишдик».
Унинг сўзларига кўра, мулоқот чоғида Америка қўшинларининг Полша ҳудудидаги иштироки ва уни кенгайтириш имкониятлари атрофлича муҳокама қилинган. Навроцкий, шунингдек, Доналд Трампни Варшавага расмий ташриф буюришга таклиф этди. Таклиф қабул қилинди, аммо ташриф санаси ҳозирча аниқ белгиланмаган.
Мутахассисларнинг қайд этишича, АҚШ ва Полша ўртасидаги ҳамкорлик Шарқий Европадаги хавфсизлик мувозанатини таъминлашда муҳим рол ўйнайди.
«Замин»ни Telegram’да ўқинг!
