АҚШ президенти Доналд Трамп турли давлатлардан олиб кириладиган маҳсулотларга юқори божлар жорий қилди. У бу орқали Америка иқтисодиётини кучайтириш ва иш ўринларини яратишни мақсад қилганини айтмоқда. Мутаҳассислар эса бу чоралар экспортчиларни бошқа бозорлар, айниқса Хитой томон йўналтираётганини таъкидлашмоқда.
Бразилия дунёдаги энг йирик қаҳва ишлаб чиқарувчи мамлакат бўлса-да, АҚШ унинг маҳсулотларига 50 фоизлик бож қўйди. Натижада бразилиялик компаниялар Хитой бозорига фаол кириб бормоқда. Юзлаб фирмалар аллақачон Хитойга қаҳва экспорти учун рўйхатдан ўтган.
Худди шундай, Ҳиндистоннинг чой ва денгиз маҳсулотлари ишлаб чиқарувчилари ҳам АҚШ билан савдода қийинчиликларга дуч келмоқда. Улар Хитой ва Европа бозорларини муқобил йўналиш сифатида кўриб чиқмоқда. Мутаҳассислар бу жараён америкалик харидорлар учун маҳсулот нархларининг ошишига олиб келиши мумкинлигини айтмоқда.
Таҳлилчиларнинг фикрича, Трампнинг бож сиёсати охир-оқибат америкалик истеъмолчиларга оғирлик қилади, экспортчилар эса Хитой ва бошқа йирик бозорлар билан ҳамкорликни кучайтиради.
«Замин»ни Telegram’да ўқинг!
