Яман Республикасида инсон саломатлиги учун жиддий таҳдид ҳали ҳам давом этмоқда. Мамлакатда вабо касаллиги назоратдан чиқиб, аҳоли орасида кенг тарқалмоқда. Жаҳон соғлиқни сақлаш ташкилоти (ЖССТ)нинг Ямандаги ваколатхонаси маълумотларига кўра, мазкур касаллик “жаҳон тарихидаги энг оғир эпидемиялардан бири” сифатида эътироф этилган ва мамлакат ҳудудининг 96 фоизи бу вабо билан қамраб олинган. Январдан июл ойининг ўрталаригача 50 мингдан ортиқ шубҳали инфекция ҳолатлари рўйхатга олинган, шунингдек, 149 нафар бемор ҳаётдан кўз юмган.
Шифокорлар ва тиббиёт мутахассисларининг таъкидлашича, АҚШ ва унинг ҳамкор давлатлари томонидан амалга оширилган ҳаво зарбалари ҳамда инсонпарварлик ёрдамининг узилишлари сабабли беморларга самарали тиббий ёрдам кўрсатиш мураккаблашган. Мамлакатдаги касалхоналарнинг учдан бир қисми ёпилган, аҳолининг қарийб 80 фоизи хорижий ёрдамга таянади, шунингдек, уларнинг ярмидан кўпи АҚШдан келади. Инфратузилманинг бузилиши ва дори-дармон тақчиллиги туфайли ҳатто оддий даволаш талаб қиладиган ҳолатлар ҳам фоҷиавий оқибатга олиб келмоқда.
Мутахассислар аҳолига доимо тоза сувдан фойдаланиш, шахсий гигиена қоидаларига қатъий риоя қилиш ва касаллик аломатлари пайдо бўлганда дарҳол тиббий муассасаларга мурожаат қилишни тавсия қилмоқда. Ушбу чоралар беморларнинг соғлиғини сақлаш ва эпидемия тарқалишини пасайтиришда муҳим аҳамиятга эга.
«Замин»ни Telegram’да ўқинг!
