АҚШнинг собиқ президенти Доналд Трамп жамоатчиликка янги ва ғаройиб дастурни тақдим этди. Унинг маълумот беришича, “Олтин карта” орқали ҳам шахсий шахслар, ҳам йирик корпорациялар Америкада тезлаштирилган тартибда резидентлик ҳуқуқига эга бўлишлари мумкин бўлади.
Маълумотларга кўра, “Олтин карта”нинг шахсий версияси 1 миллион доллардан сотилади. Корпорациялар учун эса кейинчалик 2 миллион долларлик махсус тури ишга туширилиши кўзда тутилган. Бу карта нафақат нуфузли, балки қатор ҳуқуқий имкониятларни ҳам тақдим этади.
Карта дизайни ҳам рамзий тарзда тайёрланган. Унда Трампнинг портрети, Америка қудратининг рамзи бўлган бургут, Озодлик ҳайкали ва миллий байроқ акс этган. Шунингдек, унда “Trump Gold Card” ёзуви ҳам жой олган.
Трампнинг таъкидлашича, бу дастур мамлакат иқтисодиётига улкан фойда келтиради:
“Йиллар давомида ноқонуний муҳожирлар оқиб келди, иммиграция тизими издан чиқди. Эндиликда америкаликлар ва солиқ тўловчилар қонуний тизимдан самара кўради. Олтин карта қисқа вақт ичида 100 миллиард доллардан ортиқ даромад келтиради. Бу маблағ орқали солиқлар камайтирилади, иқтисодий ўсиш таъминланади ва давлат қарзларини қисқартиришга йўналтирилади”, — деди у.
Расмий маълумотларга кўра, ушбу карта муайян ҳолларда визанинг ўрнини босиши мумкин. Бироқ миллий хавфсизлик ёки бошқа омиллар туфайли унинг бекор қилиниши эҳтимолдан холи эмаслиги қайд этилган.
Шу билан бирга, Трамп маъмурияти “Trump Platinum Card”ни ҳам жорий қилиш ниятида. Бу карта эгаларига йилига 270 кунгача АҚШда яшаш имконини бериши, шу билан бирга мамлакат ташқарисида топилган даромадларига солиқ тўламаслик ҳуқуқини тақдим этиши режалаштирилган.
Мутахассислар фикрича, ушбу ғоя Трампнинг сиёсий саҳнага яна қайтишида муҳим воситага айланиши мумкин. Шу билан бирга, ундан кутилаётган молиявий даромад АҚШ иқтисодиётига катта рағбат бериши эҳтимол қилинмоқда.
«Замин»ни Telegram’да ўқинг!
