Трамп: Россия-Украина уруши яқинда тугамайди
Доналд Трамп Россия-Украина уруши яқин орада тугамаслигини айтди. У Россия иқтисодиёти издан чиқаётганини ва Украина армияси катта қўшинни тўхтатишда яхши иш олиб бораётганини таъкидлади. Трамп Хитой ва Ҳиндистонни Россия нефтини сотиб олаётгани учун урушнинг "асосий молиячилари" деб атади ҳамда Виктор Орбанни Россия нефтидан воз кечишга кўндириш эҳтимолини билдирди.
АҚШ президенти Дональд Трамп Нью-Йоркда БМТ Бош Ассамблеясининг 80-сессияси доирасида Украина раҳбари Владимир Зеленский билан қўшма матбуот анжумани ўтказди.
Унинг айтишича, Россия-Украина уруши ҳали тез орада якунланишига умид йўқ.
— Россия унчалик кучли эмас. Бу улар учун осон кечиши керак эди. Аммо кўриниб турибдики, уруш узоққа чўзилади, — деди Трамп.
Президентнинг фикрига кўра, Россия иқтисодиёти издан чиқмоқда ва бу тинчлик йўлидаги муҳим қадам ҳисобланади:
— Энг катта ютуқ — бу Россия иқтисодидир. У ҳалокатли ҳолатда, вайронага айланмоқда. Очиғини айтсам, Украина армияси катта қўшинни тўхтатишда жуда яхши иш олиб бормоқда, — дея қўшимча қилди у.
Трамп, шунингдек, Хитой ва Ҳиндистон Россия нефтини сотиб олишни давом эттираётгани сабабли уларни урушнинг “асосий молиячилари” сифатида атади. У Венгрия бош вазири Виктор Орбан билан ҳам мулоқот қилиб, уни Россия нефтини харид қилишдан воз кечишга кўндириш эҳтимолини истисно этмади.
Изоҳлар 0
…