Оқ уй АҚШ президенти Дональд Трамп ва Исроил бош вазири Беньямин Нетаньяхунинг Вашингтондаги учрашуви тафсилотларини ошкор қилди. Бу ҳақда Оқ уй ўзининг ижтимоий тармоқдаги саҳифасида маълумот берди.
Баёнотда айтилишича, Нетаньяху Қатар Бош вазири Муҳаммад Абдел Раҳман Ал-Тани билан телефон орқали мулоқотда Доҳага уюштирилган ракета ҳужуми учун Қатардан узр сўраган. Шунингдек, у Исроил ХАМАС раҳбариятини нишонга олгани ва Қатар суверенитетини бузганидан афсусда эканлигини таъкидлаб, бундан кейин бундай ҳужумлар содир этмаслигини ваъда қилган.
Қатар Бош вазири эса мазкур кафолатларни олқишлаб, Доҳа минтақавий хавфсизлик ва барқарорликни таъминлашда ҳисса қўшишга тайёрлигини билдирди.
Трамп ўз навбатида, кўп йиллик зиддият ва тушунмовчиликлардан кейин Исроил ва Қатар муносабатларини яхшилаш истагини билдирди. Оқ уй баёнотида таъкидланишича, Нетаньяху ва Ал-Тани Трампнинг уч томонлама механизм яратиш таклифини қабул қилиб, мулоқотни кучайтириш, норозиликларни бартараф этиш ва таҳдидларнинг олдини олиш бўйича саъй-ҳаракатларни мувофиқлаштиришга рози бўлган.
Шунингдек, учрашувда АҚШнинг Ғазодаги урушни тугатиш ва Яқин Шарқда хавфсизликни яхшилаш режаси ҳам муҳокама қилинди.
“Zamin”ни Telegram'да ўқинг!
