Исроил ва ХАМАС ўртасида Мисрда давом этаётган музокаралар ижобий натижалар бермоқда — яқин икки кун ичида томонлар келишувга эришиши мумкин. Бу ҳақда The Times of Israel нашри фаластинлик манбага таяниб хабар берди.
Маълумотларга кўра, муҳокамаларда гаровда бўлган 48 нафар инсонни озод этиш эвазига тахминан 2000 нафар фаластинлик асирни қутқариш масаласи кўриб чиқилмоқда. Шунингдек, Исроил армиясининг Ғазо секторидан қисман чиқиб кетиши ҳам муҳокама марказида турибди.
Музокараларнинг кейинги босқичларида эса ХАМАСнинг қуролсизланиши ва Ғазонинг урушдан кейинги бошқарув тизими ҳақида фикр алмашиш режалаштирилган.
Al Arabiya телеканали билан суҳбатлашган исроиллик манбанинг таъкидлашича, “томонлар режанинг илк босқичи бўйича эҳтиёткорлик билан яқинлашмоқда”, АҚШ президенти Дональд Трамп эса жараённи тезлаштириш учун музокарачиларга босим ўтказаётгани айтилмоқда.
Sky News Arabia телеканали хабарига кўра, Вашингтоннинг жараёндаги фаоллиги Қатар ва Мисрдан олинган “ижобий сигналлар” билан боғлиқ. Манбага кўра, “музокаралар якуний босқичга кирганини кўрсатувчи очиқ белгилар мавжуд”.
“Zamin”ни Telegram'да ўқинг!
