Италияда бош вазир Жоржия Мелони етакчилик қилаётган “Италия биродарлари” (Fratelli d’Italia, FDI) партияси жамоат жойларида бурқа, ниқоб ва паранжи кийишни тақиқлаш ҳамда масжидларни молиялаштириш устидан назоратни кучайтиришни кўзда тутувчи қонун лойиҳасини парламентга тақдим этди, деб партиянинг расмий сайти хабар берди.
FDI партияси депутатлари қонун лойиҳасини парламентнинг қуйи палатаси – Депутатлар палатасига “Камситишга қарши” номи билан тақдим этган. Ҳужжатда бурқа, ниқоб ва паранжи давлат муассасалари, мактаблар ва университетлар каби жамоат жойларида тақиқланиши, масжидлар учун хайрия ва молиялаштиришда шаффофлик жорий этилиши ҳамда мажбурий никоҳ учун қаттиқроқ жазо белгиланиши таклиф этилган.
Қонун лойиҳасига кўра, паранжи тақиқини бузган шахсларга 300 евродан 3000 еврогача (уч юздан уч минг еврогача) жарима солиниши мумкин. Жорий йилнинг январ ойида Мелони коалициясидаги “Лига” партияси ҳам шунга ўхшаш қонунни таклиф этган, аммо унинг қамрови FDI лойиҳасидан торроқ бўлган. Ҳозирда “Лига” лойиҳаси парламент қўмитасида кўриб чиқилаётган бўлса-да, у FDI таклифи билан бирлаштириладими, номаълум. Қонун муҳокамаси санаси ҳали белгиланмаган, бироқ парламентда ўнг партиялар кўпчиликни ташкил этгани боис, унинг қабул қилиниши эҳтимоли юқори деб баҳоланмоқда.
“Zamin”ни Telegram'да ўқинг!
