АҚШ президенти Дональд Трамп Испаниянинг мудофаа харажатларини оширишдан бош тортгани учун Мадридга иқтисодий босим ўтказиш ниятида эканини билдирди. Унинг сўзларига кўра, Испания НАТО давлатлари орасида ялпи ички маҳсулотнинг 5 фоизини мудофаа эҳтиёжларига сарфламаётган ягона аъзо ҳисобланади.
“Мен Испаниядан жуда норозиман. Улар НАТОда мудофаа харажатларини 5 фоизга етказмаган ягона давлат. Шу сабабли Испания маҳсулотларига импорт тарифлари жорий этишни кўриб чиқмоқдаман”, — деди Трамп Оқ уйда журналистлар билан суҳбатда.
Унга кўра, Мадриднинг бу масалада сустқадамлиги Европа хавфсизлигига салбий таъсир кўрсатиши мумкин. Аввалроқ Трамп Финляндия президенти Александр Стубб билан учрашувда ҳам Испаниянинг мудофаа харажатлари бўйича бошқа НАТО аъзоларидан анча ортда қолаётганини таъкидлаган эди.
“Бизда битта орқада қолган мамлакат бор — бу Испания. Биз улар билан алоқа қилиб, нима учун мажбуриятларини бажара олмаётганини аниқлашимиз керак. Уларда ҳеч қандай сабаб йўқ. Балки, очиғини айтганда, уларни НАТОдан чиқариш вақти еткандир”, — деди Трамп.
Испания ҳукумати эса ўз навбатида, мудофаа харажатларини белгиланган кўрсаткичга етказмаган бўлса-да, қуролли кучларнинг жанговор тайёргарлигини ошириш ва НАТО билан келишилган ташаббусларни тўлиқ бажараётганини билдирмоқда.
“Zamin”ни Telegram'да ўқинг!
