18 октябрь куни АҚШ бўйлаб миллионлаб фуқаролар мамлакат президенти Доналд Трампнинг сиёсий йўналишига норозилик билдириш учун кўчаларга чиқди, деб хабар берди Reuters.
Ташкилотчилар маълумотига кўра, мамлакатнинг турли ҳудудларида 2700 дан зиёд митинг бўлиб ўтган. Энг йирик норозилик ҳаракатлари Вашингтон, Нью-Йорк ва Чикагода тўпланган. Барча йиғинларда жами 7 миллионга яқин киши иштирок этгани айтилмоқда.
Намойишчилар қўлларида Америка байроқлари ва турли шиорлар ёзилган плакатлар билан чиқишди: “Қиролга йўқ”, “Американи миллиардерлар ўлдирмоқда”, “Режимдан қутулинг”, “Монархия эмас — демократия”. Ушбу сўзлар митингнинг умумий кайфиятини — эркинлик ва халқ бошқаруви учун чақириқни ифода этди.
Reuters ёзишича, норозилик акциялари тинч йўсинда ўтди. Уларда фақат ёшлар эмас, балки кексалар, болали оилалар ҳам қатнашган. Ҳеч қандай зўравонлик ёки ҳибс ҳолатлари қайд этилмаган.
Намойишлар ташаббускори бўлган Indivisible ташкилоти ҳаммуассиси Ли Гринберг митинглар ҳақида шундай деди:
«Америкалик учун “Бизда қироллар йўқ” дейишдан ва тинч норозилик билдириш ҳуқуқидан фойдаланишдан муҳим нарса йўқ».
Кузатувчиларнинг фикрича, ушбу митинглар фақат бир кунлик норозилик эмас, балки Трампнинг кейинги сиёсий ҳаракатларига бўлган чуқур норозиликнинг кўриниши ҳисобланади. Жумладан, иммиграцияни чеклаш бўйича ҳарбий чоралар, миллий гвардияни шаҳарларга жойлаштириш ва сиёсий рақибларга нисбатан жиноий таъқиблар бу фуқароларда катта ташвиш уйғотган.
Трамп эса бу ҳаракатларни “жиноятчиликка қарши кураш ва миллий хавфсизликни мустаҳкамлаш чоралари” деб асослаб келмоқда. Шу билан бирга, Республикачилар партияси норозилик намойишларини “Америкага нафрат қўзғовчи митинглар” деб атади.
Митинглар давлатнинг бир қатор ижтимоий дастурларини вақтинча тўхтатиб қўйган ҳукумат ёпилиши фонида ўтди. Бу эса юз минглаб давлат хизматчилари ишсиз қолган вазиятда халқнинг норозилик кайфиятини янада оширди.
Бу галги чиқишлар июнь ойида бўлиб ўтган шунга ўхшаш акциялардан кейинги иккинчи йирик тўлқин ҳисобланади. Америка жамоатчилиги фикрича, бу митинглар орқали мамлакат аҳолиси ўз демократик ҳуқуқларини яна бир бор эслатди.
Қизиғи шундаки, намойишлар кечаётган вақтда президент Трамп Флоридада гольф ўйнаш билан банд бўлган. Бу ҳолат ҳам кўпчилик томонидан сиёсий рамз сифатида баҳоланди — халқ кўчада, раҳбар эса ҳордиқда.
Шундай қилиб, Америкадаги оммавий норозиликлар мамлакат сиёсий ҳаётида янги босқични бошлаб берди. Миллионлаб фуқароларнинг овози мамлакатда демократия ва эркинлик йўлидаги кураш ҳали якунланмаганини ёдга солди.
“Zamin”ни Telegram'да ўқинг!
