АҚШ президенти Доналд Трамп Россия президенти Владимир Путинга Украинадаги урушни тугатишни тавсия қилди. Унга кўра, Москва янги ядровий қуролларни синовдан ўтказиш ўрнига тинчлик ҳақида ўйлаши керак. Трамп бу фикрни 27-октабр куни самолёт бортида журналистлар билан суҳбатда билдирди.
Трампнинг сўзларига кўра, АҚШ Россия қирғоқлари яқинида ядровий сувости кемасига эга ва бу мамлакат хавфсизлигини таъминлаш учун етарли кучга эга. “Улар билишади, бизда дунёдаги энг қудратли ядровий сувости кемаси бор. Шунинг учун бизга 8 минг миля учишнинг ҳожати йўқ”, — деди у.
Россия президенти Владимир Путин эса бир кун аввал ядровий двигателли ракетаси муваффақиятли синовдан ўтганини маълум қилган эди. Кремлга кўра, бу қурол ҳар қандай мудофаа тизимини ёриб ўтиш қобилиятига эга. Ракеталар 14 минг километр масофани босиб ўтган.
Кремл матбуот котиби Дмитрий Песков Трампнинг фикрларига жавобан Россия ўз миллий манфаатларидан келиб чиқиб иш тутишини билдирди. Унга кўра, янги қуроллар мамлакат хавфсизлигини таъминлаш учун зарур бўлиб, бу Вашингтон билан муносабатларга салбий таъсир қилмаслиги керак.
Трамп Россиянинг урушни чўзаётганини танқид қилиб, агар тинчлик ўрнатилмаса, янги санкциялар қўлланиши мумкинлигини ҳам эслатиб ўтди. “Бир ҳафта ичида тугаши керак бўлган уруш энди тўртинчи йилга кирди. Путин ракеталарни эмас, тинчликни синаб кўриши керак”, — деди АҚШ президенти.
