Чехия шимоли-шарқида юз берган ғайриоддий ўғирлик ҳодисаси мамлакат темир йўл тизимида жиддий фалажликка олиб келди. Новинкй нашрининг хабар беришича, номаълум шахслар поездларнинг хавфсиз ҳаракатини таъминлайдиган калитлар, светофорлар ва бошқарув кабелларини кесиб ўғирлаб кетган.
Натижада якшанба куни кечқурун юзлаб йўловчилар қатнаётган ўнлаб поездлар ҳаракати тўхтаб қолди. Полиция хабарига кўра, ҳодиса жойида олиб борилган тезкор чора-тадбирлар натижасида уч нафар гумонланувчи қўлга олинган.
Мутахассислар ўғирланган кабеллар темир йўл сигнал тизими учун муҳим аҳамиятга эга эканини, уларнинг йўқолиши эса бутун йўл хавфсизлигини издан чиқарганини билдирмоқда.
Транспорт хизматлари вакиллари қисман ҳаракатни бир неча соатдан кейин тиклаган, бироқ тизимни тўлиқ қайта ишга тушириш душанба кунигача давом этиши кутилмоқда.
Ҳодиса Чехияда сўнгги йилларда кузатилган энг йирик инфратузилма ўғриликларидан бири сифатида қайд этилмоқда.
