Хитойдаги йирик нефтни қайта ишлаш заводлари Россиядан нефт импортининг бир қисмини тўхтатиш ҳақида қарор қабул қилди. Бу ҳақда халқаро иқтисодий агентлик Bloomberg маълумот берди.
Манбага кўра, нафақат давлатга тегишли, балки хусусий компаниялар ҳам “Роснефть” ва “Лукойл” билан ҳамкорлик қилишдан вақтинча воз кечмоқда. Бунинг асосий сабаби — АҚШ ва Ғарб давлатлари томонидан жорий қилиниши мумкин бўлган иккиламчи санкциялар хавфидир.
Маълум қилинишича, рад этишлар асосан ESPO маркасидаги Сибир нефти импортига таъсир кўрсатмоқда. Маслаҳатчи компания Rystad Energy AS ҳисоб-китобига кўра, чекловлар натижасида Россиядан Хитойга экспорт ҳажми кунига тахминан 400 минг баррелга, яъни умумий етказиб беришнинг қарийб 45 фоизига камайган.
Аввалроқ “Роснефть” ва “Лукойл” АҚШ санкциялар рўйхатига киритилганидан кейин Хитойнинг йирик давлат компаниялари Россия нефтини денгиз орқали харид қилишни тўхтатгани ҳақида ҳам хабар берилган эди.
Иқтисодчилар фикрича, бу қарор Хитойнинг халқаро бозордаги нуфузини сақлаб қолиш ва санкция хавфидан қочишга қаратилган эҳтиёткорлик сиёсати билан боғлиқ. Шу билан бирга, мамлакат нафақат Россия билан, балки Яқин Шарқ ва Африка давлатлари билан ҳам энергия ҳамкорлигини кенгайтириш йўлида ҳаракат қилмоқда.
Экспертлар бу ҳолат Россия нефтининг нархига ҳам таъсир кўрсатиши мумкинлигини таъкидламоқда, чунки Хитой бугунги кунда Москва учун энг йирик экспорт бозорларидан бири ҳисобланади.
“Zamin”ни Telegram'да ўқинг!
