АҚШ президенти Дональд Трамп ўз номи билан аталадиган стадион қурилишини хоҳлаётгани маълум бўлди. Бу ҳақда ESPN нашри хабар берди.
Маълумотларга кўра, Миллий футбол лигаси (NFL) жамоаси — “Вашингтон Коммандерс” учун 3,7 миллиард доллар қийматида янги стадион барпо этилмоқда. Иншоот 1961–1996 йилларда жамоа уй ўйинларини ўтказган Роберт Кеннеди номидаги стадион ўрнида қурилаётган бўлиб, уни 2030 йилда фойдаланишга топшириш режалаштирилган.
Манбаларнинг таъкидлашича, клубнинг ҳаммуассиси Жош Ҳаррис бошчилигидаги инвесторлар ва Трамп жамоаси ўртасида норасмий музокаралар ҳам бўлиб ўтган.
“Бу президентнинг шахсий хоҳиши ва катта эҳтимол билан амалга ошади”, — деган Оқ уй мансабдорларидан бири.
Оқ уй матбуот котиби Керолин Ливитт эса Трамп янги стадион қурилишига катта ҳисса қўшганини таъкидлаб, “Бу ном стадион учун жуда мос, чунки айнан президент Трамп унинг қурилишида муҳим роль ўйнаган”, — деди.
Шу билан бирга, стадион номини расмий тасдиқлаш ҳуқуқи туман кенгаши ва федерал ер агентлиги ихтиёрида бўлиб, “Коммандерс” жамоаси бу масалада мустақил қарор қабул қила олмайди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
