Россиянинг Украинага қарши урушига чек қўйиш бўйича баҳс-мунозараларга сабаб бўлган АҚШ режаси Германия Бундестагининг кун тартибига ҳам кириб келди. Чоршанба, 26 ноябр куни формал жиҳатдан 2026 йил бюджети лойиҳасига бағишланган Олий дебатларда (Generaldebatte) Украинага ёрдам ва Россия билан муносабатлар асосий мавзуга айланди, бу эса кучли сиёсий тангликни юзага келтирди.
Мухолифатнинг "Россия гази" талаби
Мунозара асосий мухолиф "ГуМ" партияси (АфД) ҳамраиси Алис Вайделнинг нутқи билан бошланди. У ҳукумат ложасида ўтирган канцлер Фридрих Мерцга мурожаат қилиб, "Шукрки, Доналд Трамп туфайли бизда тинчликка ҳақиқий имконият бор, сиз эса бунга алоқадор эмассиз", — деди. Вайдел Украинага ёрдамни ошириш режаларини, Киевдаги коррупцион жанжални тилга олиб, кескин танқид қилди. Унинг ҳамкасби Тино Хрупалла эса "Украина Германиянинг ўн еттинчи федерал ери эмас", дея қўшимча қилди. Вайдел ўзининг 12 бандлик режасида, афтидан, аввалги талабларини қайтариб, Россиядан "арзон" газ ва нефт харид қилишни тиклашни таклиф қилди.
Канцлер Мерц: Таслим бўлиш эвазига тинчлик йўқ!
Канцлер Фридрих Мерц Россия-Украина урушига алоҳида қисм ажратиб, бу Европа тинчлиги ва эркинлигини сақлаш масаласи эканини таъкидлади. "Биз ўлик сукутини хоҳламаймиз. Биз таслим бўлиш ҳисобига тинчликни истамаймиз", — деди у. Мерцнинг фикрича, "ҳақиқий барқарор тинчлик" йирик державаларнинг келишуви асосида, Украина ва европаликлар розилигисиз қилиниши мумкин эмас. У буни Трампга телефонда шахсан айтганини таъкидлади. Канцлернинг нутқи "уруш қўзғовчи" деб аталган ҳақоратли қичқириқлар билан кузатилди. У, шунингдек, Киевни "қанча керак бўлса, шунча" қўллаб-қувватлашга ваъда бериб, Россиянинг музлатилган активларидан фойдаланиш имкониятини тилга олди.
Яшилларнинг ҳиссиётли мурожаати ва молиявий чигаллар
Мухолиф "Яшиллар" фракцияси ҳамраиси Бритта Хасселман энг таъсирчан нутқ сўзлади. У Вайделга қарата "Қандай қилиб нутқни Украинада азият чекаётган одамлар ҳақида ўйламасдан бошлаш мумкин?!", дея мурожаат қилди. Хасселман АҚШ/Россия таклифларини "Украинани тобе қилиш режаси" деб атади. У, шунингдек, музлатилган Россия активларини Украина эҳтиёжлари учун ишлатишга эришиш ваъдасини назорат қилишини билдирди. Бу масала ҳозирча катта миқдордаги маблағ сақланаётган Белгиянинг қаршилиги сабаб ечилмаган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
