Финляндияда XX асрда техник тараққиёт рамзига айланган стационар телефон алоқасидан бутунлай воз кечиш бўйича қарор қабул қилинди. Мамлакатдаги йирик операторлардан бири — Elisa компанияси 2026 йил 30 июнгача ҳудуд бўйлаб барча стационар телефон тармоқларини тўлиқ тўхтатишини маълум қилди. Ҳозирда бу хизматдан фойдаланаётган абонентлар сони бир неча минг нафар экани қайд этилади.
Yle хабарига кўра, 2026 йил апрель ойининг охирида мижозларга шаҳар телефони узилиши ҳақида огоҳлантирувчи хат юборилади. Унда алоқа хизматини алмаштириш бўйича муқобил ечимлар ҳам таклиф этилади. Компания таъкидлашича, обуна якунлангандан кейин ҳам уй телефони рақамини сақлаб қолиш имконияти бор — у рақам мобил тармоққа ўтказилиши мумкин.
Финляндияда яна икки йирик алоқа оператори — Telia ва DNA ҳам аввалроқ стационар хизматни босқичма-босқич тугатишини билдирган эди. Телиа бу йўналишдан 2019 йилда воз кечган, DNA эса 2021 йилдан бошлаб уни аста-секин қисқартира бошлаган. Маҳаллий нашрлар буни уй телефони одамлар ва оилалар ўртасидаги асосий боғланиш воситаси бўлган бир давр якунланаётгани сифатида баҳоламоқда.
“Zamin”ни Telegram'да ўқинг!
