Қозоғистоннинг Каспий қувур консорциуми (КҚК) орқали экспорт қилинаётган CPC Blend навли нефти жаҳон бозорларида бир баррелига 5 долларгача чегирма билан сотилмоқда. Бу ҳолат 2022 йил охиридан буён кузатилган энг салбий кўрсаткич сифатида баҳоланмоқда.
Маълум қилинишича, арзонлашган нархлар CPC Blend нефтига бўлган қизиқишни оширган ва қисқа муддат ичида талаб тикланган. Шу боис паст нархлар узоқ вақт сақланиб қолмаган.
Нарх пасайишига асосий сабаб сифатида Қозоғистон нефтининг йирик харидорлари етказиб беришдаги узилишлардан хавотирланиб, вақтинча бошқа нефть навларига ўтиб кетгани қайд этилмоқда.
Сўнгги ойларда Қозоғистон нефтини КҚК орқали юбориш бир неча бор тўхтатилган. Бунга Украина дронлари ҳужумлари, ноқулай об-ҳаво шароити, юклаш терминалидаги таъмирлаш ишлари ҳамда январ ойида Тенгиз конидаги генератор ёнғини ортидан ишлаб чиқариш ҳажмининг қисқариши сабаб бўлган.
«Reuters» маълумотларига кўра, февраль ойида Тенгиз конидан нефть экспорти режанинг атиги 35 фоизини ташкил этиши мумкин. Январ ойида эса умумий экспорт ҳажми режалаштирилган кўрсаткичнинг тахминан ярмига тенг бўлган.
Етказиб беришдаги узилишлар туфайли январ ойида Кашаган конида қазиб олинган нефтьнинг бир қисми илк марта ички бозорга йўналтирилди. Одатда Қозоғистон нефть экспортининг қарийб 80 фоизи айнан КҚК ҳиссасига тўғри келади. Қувурга Тенгиз, Кашаган ва Карачаганак конларидан хомашё етказиб берилади.
“Zamin”ни Telegram'да ўқинг!
