Мюнхен хавфсизлик конференциясида АҚШ сиёсатининг Украинага нисбатан йўналиши яна бир бор кескин баҳсларга сабаб бўлди. Демократик партиядан президентлик сайловларида иштирок этган собиқ номзод Ҳиллари Клинтон ушбу майдонда АҚШ президенти Доналд Трампнинг Украина бўйича сиёсатини қаттиқ танқид қилди.
Клинтоннинг таъкидлашича, Трамп маъмуриятининг Украинага нисбатан позицияси “шармандали” ва Киевни Путин билан “таслимкор келишув”га мажбурлашга уриниш — тарихий жиҳатдан ҳам, ахлоқий жиҳатдан ҳам оғир хато. У, шунингдек, Путин ва Трамп Украина халқи азоб-уқубати фонида манфаат излаётганини ҳам кескин баён қилди.
Собиқ давлат котиби Украина бугун фақат ўз ерлари учун эмас, балки демократия, эркинлик ва цивилизация қадриятлари учун “олд чизиқ”да курашаётганини айтди. Унинг фикрича, минглаб инсонлар йўқотилаётган пайтда бу оғриқни тушунмаслик ёки бепарво қараш — жуда хавфли сигнал.
Клинтон танқидини янада кучайтириб, Трамп “Ғарб қадриятлари”га хиёнат қилгани ҳақида ҳам гапирди: НАТО низоми, Атлантика хартияси ва Инсон ҳуқуқлари умумжаҳон декларациясини тилга олган ҳолда, бу принципларни менсимаслик оқибатида жаҳон тартиби заифлашишини уқтирди. Шунингдек, у Трамп ўз ҳокимият модели учун Путин режимига суянаётганини айтиб, залдагилардан ҳеч ким бундай ҳисоботсиз, жазосиз иш тута оладиган режимда яшашни хоҳламаслигини таъкидлади.
Бу чиқишнинг асосий “нерви” шу: агар Украина бўйича қарорлар адолат ва хавфсизлик ҳисобидан эмас, қулайлик ва тезкор “битим” ҳисобига қабул қилинса, кейинги йилларда Европа хавфсизлиги ҳам, трансатлантик ишонч ҳам қаттиқ силкиниши мумкин. Яъни бу мавзуда “ҳозир бироз ён бериб қутуламиз” деган сценарий кейин каттароқ муаммога айланиб кетиши эҳтимоли бор — конференциядаги руҳ ҳам айнан шу хавотирни кўрсатяпти.
“Zamin”ни Telegram'да ўқинг!
