Табиатнинг ҳайратланарли ва улкан ҳодисаларидан бири ўз якунига етди. 2025 йилнинг якунига келиб, сайёрамизнинг энг йирик муз бўлаги сифатида тан олинган А23а айсберги деярли тўлиқ емирилди ва ўзининг дастлабки кенглигининг 99 фоизидан маҳрум бўлди. Бу ҳақда Арктика ва Антарктика илмий-тадқиқот институти мутахассислари маълум қилишди.
Муз гигантининг сўнгги нафаси
“Жорий йилнинг январь ойида ушбу муз тоғининг ҳудуди тахминан 1300 квадрат километрни ташкил қилар эди. Бироқ бугунги кунга келиб, ундан атиги 50 квадрат километрдан ҳам камроқ қисм қолган. Айни дамда А23а очиқ уммон бағрида сузиб юрибди ва барчамизнинг кўз ўнгимизда парчаланиб бормоқда”, — дея таъкидлади институтнинг Муз ва гидрометеорология маълумотлари маркази етакчи эксперти Полина Солошчук.
Сўнгги уч ойлик давр ичида А23а қарийб минг километр масофани ортда қолдириб, Жанубий ва Атлантика океанлари туташган чегарагача етиб келди. Айни вақтда у жанубий кенгликнинг 49-параллели атрофида ҳаракатланмоқда. Мутахассисларнинг хулосаси эса қисқа ва кескин: “А23а айсберги ўз ҳаётини якунлади”.
Тарихга муҳрланган музлик тақдири
Маълумот учун, А23а айсберги бундан анча йиллар олдин — 1986 йилда Антарктидадаги Филхнер шелф музлигидан узилиб чиққан эди. Ўшанда унинг умумий майдони 4170 квадрат километрни ташкил этган бўлиб, бу кўрсаткич Санкт-Петербург шаҳри ҳудудидан қарийб икки баробар катта демакдир.
Ушбу муз гиганти 30 йилдан зиёд вақт давомида Уэдделл денгизининг саёзлик қисмида қўзғалмасдан турди. Кейинчалик Антарктида соҳиллари бўйлаб ўз саёҳатини бошлади. 2025 йилнинг бошида яна бир бор тўхтаб қолган бўлса-да, август ойига келиб Жанубий Жоржия ороли яқинида ҳаракатини қайта тиклади. Бироқ йил сўнгидаги кескин емирилиш натижасида А23а ўз ҳажмини йўқотди ва дунёдаги энг улкан айсберг мақоми билан бутунлай хайрлашди.
“Zamin”ни Telegram'да ўқинг!
