Жорий йилнинг 21 апрель куни Озарбайжоннинг Агстафа туманида жойлашган мактаблардан бирида хавотирли ҳолат юз берди. Маълумотларга кўра, 9-синф ўқувчиси билан 8-синф ўқувчиси ўртасида юзага келган келишмовчилик жиддий можарога айланиб кетган. Бу ҳақда “Oxu.az” маълум қилди.
Жанжал чоғида 9-синф ўқувчиси ўз тенгдошига ўткир тиғли буюм билан тан жароҳати етказган. Натижада 14 ёшли жабрланувчи тез ёрдам орқали туман шифохонасига олиб борилган. Шифокорлар унинг чап сон қисмидан жароҳат олганини қайд этишган.
Тиббий муассаса маълумотига кўра, беморга бирламчи ёрдам кўрсатилган ва унинг аҳволи барқарор деб баҳоланган. Шундан сўнг у уйига жавоб берилган.
Ҳодиса юзасидан ҳуқуқни муҳофаза қилувчи органлар томонидан тергов-суриштирув ишлари бошланган. Айни пайтда гумонланувчини қўлга олиш бўйича тегишли чоралар кўрилмоқда.
Мактаб маъмурияти ҳам ҳолат юзасидан расмий баёнот бериб, жабрланувчининг соғлиғи назоратда эканини маълум қилган. Шунингдек, ўқувчилар вояга етмаганини инобатга олиб, жамоатчиликдан масалага эҳтиёткорлик билан ёндашиш ва фақат расмий манбаларга таяниш сўралган.
“Zamin”ни Telegram'да ўқинг!
