Чеченистон раҳбари Рамзан Қодировнинг ўғли Адам Қодиров янги бизнес лойиҳаси билан жамоатчилик эътиборига тушди. У ўзининг “К-13” номли энергетик ичимлик брендини тақдим этгани ҳақида маълумотлар тарқалди.
Ижтимоий тармоқларда тарқалган видеоларда Адам Қодировнинг яқинлари ва дўстлари “К-13” ёзуви туширилган футболка ва кепкаларда кўриниш берган. Бу эса янги брендни илк тарғиб қилиш жараёни бошланганини англатиши мумкин.
Кузатувчилар фикрича, бренд номидаги “К” ҳарфи Қодиров фамилиясини англатиши эҳтимолдан холи эмас. “13” рақами эса ҳозирча расман изоҳланмаган бўлса-да, у рамзий маънога эга бўлиши мумкинлиги тахмин қилинмоқда.
Ҳозирча маҳсулотнинг таркиби, бозорга чиқиш санаси ва сотув ҳудудлари ҳақида расмий маълумот берилмаган. Бироқ мазкур ташаббус Адам Қодировнинг тадбиркорлик йўналишидаги илк қадамларидан бири сифатида баҳоланмоқда.
Сўнгги йилларда машҳур шахслар ва сиёсий доира вакилларининг фарзандлари турли бизнес лойиҳаларни йўлга қўяётгани кузатилмоқда. “К-13” бренди ҳам шу каби янги лойиҳалардан бири сифатида жамоатчиликда қизиқиш уйғотмоқда.
