Қозоғистонда шоқол қишлоққа кириб одамларга ҳужум қилди
Қозоғистоннинг Туркистон вилоятида шоқол қишлоққа кириб, икки бола ва бир катта ёшли шахсни тишлаб олди. 4 ёшли қизча ва 15 ёшли ўсмирга ҳужум қилган ҳайвон, ёрдамга келган 42 ёшли эркакни ҳам тишлаб улгурган. Жабрланганларга тиббий ёрдам кўрсатилиб, шифохонада даволанмоқда. Мутахассислар шоқолларнинг ҳужум қилиш сабабларини текширмоқда.
Қозоғистоннинг Туркистон вилоятида шоқол қишлоқ ҳудудига кириб келиб, икки нафар бола ҳамда бир катта ёшли шахсни тишлаб олди. Бу ҳақда Tengri News хабар тарқатди.
Маълумотларга кўра, йиртқич аввал 4 ёшли қизчани оёқлари ва бармоқларидан қаттиқ тишлаган, шундан сўнг 15 ёшли ўсмирга ҳам ҳужум қилган. Болаларга ёрдам бериш учун келган 42 ёшли эркак ҳайвонга болта билан зарба бериб, уни тўхтатишга ҳаракат қилган, аммо шоқол уни ҳам тишлаб улгурган.
Жабр кўрганларнинг барчасига шифохона шароитида зарур тиббий ёрдам кўрсатилиб, қутуришга қарши эмлаш амалга оширилган. Ҳозирда уларнинг аҳволи барқарор деб баҳоланмоқда, бироқ оғир жароҳат олган қизча шифокорлар назорати остида қолмоқда.
Мутахассисларнинг таъкидлашича, шоқоллар одатда инсонларга ҳужум қилмайди. Бундай ҳолатларга асосан учта омил сабаб бўлиши мумкин:
- қутуриш касаллиги;
- болаларини ҳимоя қилиш;
- озуқа танқислиги.
Ветеринар мутахассислар ҳужум қилган ҳайвондан намуналар олиб, унда қутуриш бор-йўқлигини аниқлаш бўйича текширув ишларини олиб бормоқда.
Изоҳлар 0
…