АҚШда миграция сиёсати янада қатъийлашмоқда. Президент Дональд Трамп маъмурияти томонидан қабул қилинган янги қарорлар мигрантлар устидан назоратни сезиларли даражада кучайтиришга қаратилган. 27 апрелдан бошлаб USCIS — АҚШ Фуқаролик ва иммиграция хизмати — текширув жараёнларини янги босқичга олиб чиқди.
Эндиликда USCIS ходимлари ФТБ маълумотлар базасига кенгайтирилган кириш ҳуқуқига эга бўлиб, аризаларни кўриб чиқишда янада чуқур текширувлар ўтказмоқда. Янги тартибга кўра, судланганлик ёки ҳибсга олинганлик ҳақидаги тўлиқ маълумотлар олинмагунча ҳеч бир ариза тасдиқланмайди. Бу эса бармоқ излари топшириш талаб қилинадиган деярли барча мурожаатларга тааллуқли.
Ушбу ўзгаришлар бир қатор муҳим йўналишларга таъсир кўрсатади. Жумладан, грин-карта (иммиграция мақомини ўзгартириш), фуқаролик олиш (натурализация), оилавий бирлашиш (қариндошлар, турмуш ўртоқлар) ҳамда бошқа виза ва бошпана турлари бўйича аризалар янада синчковлик билан кўриб чиқилади.
Янги тизимда бармоқ излари автоматик равишда ФТБ базасига юборилади ва аризачи ҳақидаги жиноий тарих тўлиқ текширилади. Агар текширув жараёни тугалланмаган бўлса, қарор қабул қилиш муддати узайтирилади. Бу эса кўплаб мурожаатчилар учун кутилмаган кечикишларга сабаб бўлиши мумкин.
Бундан ташқари, назорат чоралари янада кенгайтирилмоқда. Энди ижтимоий тармоқлардаги фаоллик, молиявий ҳолат, яшаш жойи ва ҳатто қайта суҳбатлар орқали аризачилар янада чуқур ўрганилади. Айниқса, “юқори хавф” тоифасига киритилган давлатлардан келган шахсларга алоҳида эътибор қаратилади.
USCIS расмийлари аввалги текширувлар етарлича қатъий бўлмаганини тан олиб, янги чоралар миллий хавфсизликни мустаҳкамлашга хизмат қилишини таъкидламоқда. Уларнинг фикрича, бу ўзгаришлар АҚШга таҳдид солиши мумкин бўлган шахсларнинг мамлакатда қонуний мақом олишига йўл қўймасликка қаратилган.
Қисқача айтганда, АҚШда миграция сиёсати янада қаттиқ назорат остига олинмоқда. Бу эса аризачилар учун талаблар ошиши, текширувлар узоқроқ давом этиши ва жараён янада мураккаблашишини англатади.
