АҚШда жинсий жиноятларда айбланган молиячи Жеффри Эпштейн билан боғлиқ яна бир сирли тафсилот очиқланди. Унинг собиқ камерадоши Николас Тарталоне Эпштейн ўлимидан аввал ёзган деб тахмин қилинаётган мактуб мазмуни ҳақида маълумот берди. Бу ҳақда The New York Times маълум қилди.
Маълум қилинишича, Тарталоне ушбу ёзувни 2019 йил июль ойида, Эпштейн ҳали тирик бўлган пайтда топган. Ўша даврда Эпштейн қамоқхонада бўйнида шубҳали излар билан ҳушсиз ҳолатда аниқланган эди. Шундан сўнг у бошқа бўлимга кўчирилган ва ўз жонига қасд қилиш хавфи сабаб махсус кузатув остига олинган.
Тарталоне кейинчалик берган кўрсатмаларида ёзувни қандай топганини батафсил тушунтирган. Унинг айтишича, Эпштейн бошқа камерага ўтказилгач, у ўз камерасида қолган китоблардан бирини очиб кўрган ва ичидан яширилган сариқ рангли қоғоз парчани топган.
Мазкур ёзувда терговчилар Эпштейн фаолиятини бир неча ой давомида текширган бўлса-да, “ҳеч қандай далил топилмагани” ҳақида ёзилган. Шунингдек, унда “Улар мендан нима кутяпти — йиғлайми? Вақт келди, хайрлашаман” мазмунидаги иборалар ҳам мавжуд бўлган.
Қизиғи шундаки, дастлаб Эпштейн қамоқхона ходимларига бўйнидаги жароҳатлар учун айнан Тарталонени айблаган ва ўз жонига қасд қилиш нияти йўқлигини билдирган. Аммо орадан кўп ўтмай, у бу фикридан қайтиб, камерадоши билан муаммоси йўқлигини ва ўзини хавфсиз ҳис қилганини айтган.
Тарталоне ушбу ёзувни ўз адвокатларига топширганини маълум қилган. Унинг таъкидлашича, агар Эпштейн уни айблашда давом этса, бу ҳужжат судда ҳимоя воситаси сифатида хизмат қилиши мумкин эди. Кейинчалик ҳужжатнинг ҳақиқийлигини аниқлаш учун қўл ёзуви экспертлари ҳам жалб этилган.
Маълумотларга кўра, ушбу мактуб кейинчалик федерал суд томонидан бошқа жиноят иши доирасида махфийлаштирилган. Тарталоне адвокатлари ёзувни ҳақиқий деб баҳолаган бўлса-да, бу хулоса қандай асосга таяниб чиқарилгани ошкор этилмаган.
Таҳлилчиларнинг фикрича, ушбу янги тафсилотлар Жеффри Эпштейн иши атрофидаги саволларни янада кўпайтириши ва унинг ўлими билан боғлиқ баҳс-мунозараларни яна жонлантириши мумкин.
“Zamin”ни Telegram'да ўқинг!
