Германияда энергия ва ёқилғи нархларининг ошиши аҳоли кундалик одатларига сезиларли таъсир кўрсатмоқда. Verivox портали буюртмаси асосида ўтказилган сўровнома натижаларига кўра, немисларнинг қарийб ярми қимматчилик сабаб ҳаёт тарзини ўзгартиришга мажбур бўлган.
Сўровда иштирок этганларнинг 48 фоизи энергия ва ёқилғи нархлари юқорилиги уларнинг кундалик қарорларига таъсир қилаётганини билдирган. Айниқса, бензин нархининг ошиши кўпчиликни шахсий автомобилдан камроқ фойдаланишга ундаган.
Натижаларга кўра, респондентларнинг 29 фоизи бензин қимматлиги сабабли машина ўрнига велосипеддан фойдаланишни бошлаган. Яна 24 фоиз иштирокчи эса жамоат транспортига ўтганини айтган. Бу ҳолат Германияда транспорт харажатлари аҳоли бюджетига қанчалик таъсир қилаётганини кўрсатади.
Энергия нархлари ҳам немисларни тежамкорликка жиддийроқ ёндашишга мажбур қилмоқда. Сўров иштирокчиларининг учдан икки қисми, яъни 67 фоизи электр ва иситиш харажатлари ошгани сабаб энергияни тежашга кўпроқ эътибор қарата бошлаганини маълум қилган.
Энг кўп қўлланилаётган чоралардан бири — ишлатилмаётган электр жиҳозларини кутиш режимида қолдирмасдан, бутунлай ўчириб қўйишдир. Бундай оддий ҳаракат ҳам ойлик харажатларни камайтиришда маълум даражада ёрдам бериши мумкин.
Шунингдек, сўровда қатнашганларнинг 55 фоизи уйда иситиш тизими ҳароратини пасайтирганини билдирган. 47 фоиз респондент эса иссиқ сувдан фойдаланишни қисқартирганини айтган. Демак, қимматчилик фақат транспортга эмас, уйдаги оддий маиший одатларга ҳам таъсир ўтказмоқда.
Бироқ барча ҳам қўшимча тежамкорликка ўтаётгани йўқ. Сўров иштирокчиларининг 27 фоизи энергияни тежамаётганини билдирган. Улар буни аввалданоқ тежамкор ҳаёт кечиргани ва энди яна ниманидир қисқартириш учун имконият қолмагани билан изоҳлаган. Оддий қилиб айтганда, баъзиларда “тежаш режими” аллақачон максимумга чиқиб бўлган.
Германия автомобил клуби — ADAC маълумотларига кўра, 7 май куни бензин ва дизел ёқилғиси нархлари март ойи бошидан бери энг паст даражага тушган. Хусусан, бир литр E10 бензинининг ўртача нархи 1,984 еврони, дизел ёқилғиси эса 2,025 еврони ташкил этган.
Ёқилғи нархларининг пасайишига жаҳон бозорида нефть нархининг тушиши, шунингдек, Германия ҳукумати томонидан май ойи бошида фуқаролар учун жорий этилган “ёқилғи чегирмаси” сабаб бўлгани айтилмоқда.
Шунга қарамай, аҳоли орасида эҳтиёткорлик кайфияти сақланиб қолмоқда. Чунки нархлар вақтинча пасайиши мумкин, аммо одамлар бюджетига тушган босим дарҳол йўқолиб кетмайди. Германия мисоли яна бир бор кўрсатмоқда: энергия қимматлашса, одамлар нафақат ҳисоб-китобни, балки кундалик одатларини ҳам қайта кўриб чиқишга мажбур бўлади.
“Zamin”ни Telegram'да ўқинг!
