Дунё молия бозорларида яна жонланиш кузатилмоқда. Бу сафарги ўзгаришлар марказида эса инсониятнинг энг ишончли активи — олтин турибди. Оқ уй ва Теҳрон ўртасида Ҳўрмуз бўғозини қайта очиш бўйича кутилаётган тарихий келишув ҳақидаги хабарлар фонида, қимматбаҳо металл нархи сезиларли даражада қимматлашди.
Бугун, 25 май куни бўлиб ўтган савдоларда олтиннинг спот (жорий) нархи бир унция учун 4 579 долларгача зафарли юришни амалга оширди. Бу бир кунлик кўрсаткичда 1,6 фоизлик ўсиш демакдир. Кейинчалик харидорларнинг шиддати бироз пасайиб, баҳо 4 564 доллар атрофида барқарорлашди. Шундай бўлса-да, бу рақамлар инвесторларнинг олтинга бўлган қизиқиши ҳамон юқори эканини кўрсатмоқда.
Музокаралар ортидаги умид ва хавотир
Нуфузли Bloomberg нашрининг ёзишича, АҚШ ва Эрон ўртасидаги тинчлик музокаралари туфайли дунёнинг энг муҳим савдо йўлларидан бири бўлган Ҳўрмуз бўғозида кемалар қатнови тикланиши мумкин. Бу эса глобал иқтисодиётни қийнаб келаётган инфляция (пул қадрсизланиши) ваҳимасини бироз бўлса-да енгиллаштирди.
The Washington Post газетаси эса янада қизиқарли тафсилотларни ошкор қилди. Унга кўра:
Вашингтон ва Теҳрон расмийлари айни пайтда 60 кунлик ўт очишни тўхтатиш ҳамда Ҳўрмуз бўғозини тўлиқ очишни назарда тутувчи дастлабки битим устида қизғин иш олиб бормоқда.
Сармоядорлар нега эҳтиёткор?
Шунга қарамай, халқаро таҳлилчилар вазиятга реал баҳо беришни тавсия этишмоқда. Айни дамда бозор иштирокчилари «кутиш ва кузатиш» позициясини эгаллашган. Чунки инвесторлар Эрон томонининг ушбу келишувга қанчалик содиқ қолиши ва ҳамкорликка тайёр эканига оид реал кафолатларни ўз кўзлари билан кўришни исташмоқда.
Бундан ташқари, олтин бозорига яна бир йирик омил — АҚШ Федерал захира тизимининг (ФЗТ) сиёсати ҳам таъсир ўтказяпти. Агар ФЗТ фоиз ставкаларини янада ошириш ҳақида қарор қабул қилса, бу қимматбаҳо металлар трендини ўзгартириб юбориши мумкин.
Нима бўлган тақдирда ҳам, олтин ўзининг «хавфсиз бошпана» мақомини яна бир бор исботламоқда ва яқин кунлардаги сиёсий жараёнлар унинг кейинги тақдирини белгилаб беради.
“Zamin”ни Telegram'да ўқинг!
