13 минг метр баландликда кутилмаган мўъжиза: чақалоқ самолёт бортида дунёга келди

Turkish Airlines'нинг Конакри–Истанбул йўналишидаги рейсида одатий парвоз кутилмаганда унутилмас воқеага айланди. Йўловчилардан бирининг туғруқ жараёни бошланган ва чақалоқ 13 минг метр баландликда, самолёт бортида дунёга келган.

Туғруқ бошланганини англаган экипаж вазиятга тезда аралашган. Самолётдаги имкониятлардан фойдаланган ҳолда йўловчига ёрдам кўрсатилган ва кўп ўтмай кичкина қизалоқ дунёга келган.

Энг ҳайратланарлиси — чақалоқ ерда эмас, минглаб метр баландликда парвоз қилаётган самолётда туғилди.

Маълумотларга кўра, йўловчилардан бири чақалоқнинг қулоғига азон айтиб, унга Кадижу деб исм қўйган. Онаси ва чақалоқнинг ҳолати яхши экани билдирилган.

Одатдаги авиарейс йўловчилар учун кутилмаган тарзда янги ҳаётнинг бошланишига гувоҳ бўлган ноёб сафарга айланди.