75 йил қамоқда ўтирган АҚШлик маҳбус 101 ёшида вафот этди

АҚШда 75 йилдан ортиқ умрини қамоқхонада ўтказган энг кекса маҳбус Френсис Клиффорд Смит 101 ёшида табиий сабаблар билан вафот этди. У бир неча бор қатл қилиниши белгиланган, аммо ҳар сафар жазо ижроси кейинга қолдирилган эди.

Смитга саккиз марта қатл қилиш ҳақида қарор чиқарилган ва у саккиз марта “сўнгги кечки таом”ни истеъмол қилган. Бироқ белгиланган қатлларнинг барчаси турли сабабларга кўра бекор қилинган. Кейинчалик эса АҚШдаги энг кекса маҳбус табиий равишда ҳаётдан кўз юмди.

Смит 75 йилдан ортиқ вақтини Коннектикутдаги қамоқхонада ўтказди. У илк бор 1950 йилда ўлим жазосига ҳукм қилинган. Шунга қарамай, маҳбус ҳаётининг охирига қадар ўзи содир этмаган қотиллик учун қамалганини таъкидлаб келди. Унинг иши атрофида ўнлаб йиллар давомида турли шубҳалар ва саволлар сақланиб қолган.

Қотилликда қандай айбланган?

1949 йил 23 июль куни эрта тонгда Гринвичдаги яхта клубида ўғрилик содир бўлган. Ўша вақтда тунги қоровул Гровер Ҳарт отиб ўлдирилган. Смит 25 ёшида ушбу қотилликда айбдор деб топилган.

Ҳарт 22 калибрли револвер ўқидан ҳалок бўлган. Аммо жиноят жойидан топилган яна бир ўқ ва тўртта гильза бошқа қуролга тегишли экани аниқланган. Шу боис суд жиноятда икки киши иштирок этган, деган хулосага келган.

Жорж Лоуден исмли гумондор ўз айбини тан олган. Смитга қарши эса асосан эҳтимолий далиллар мавжуд бўлган.

Нью-Йорк штатидаги кафе қаршисида тўхтатилган кулранг Cadillac автомобилидан жиноятда ишлатилган қуроллардан бири топилган. Автомобилдан, шунингдек, яхта клубидан ўғирланган тақинчоқлар ва бошқа буюмлар ҳам аниқланган.

Смит эса ушбу кафе яқинида бир оз аввал кўринган эди. Бундан ташқари, машинадан унга тегишли деб тахмин қилинган кўйлак ҳам топилган. Мазкур далиллар суд томонидан унга ҳукм чиқариш учун етарли деб баҳоланган.

Қатл санаси саккиз марта ўзгартирилган

Смитни қатл қилиш санаси саккиз марта белгиланган ва саккиз марта бекор қилинган. 1954 йилда унга тайинланган ўлим жазоси умрбод қамоқ жазосига алмаштирилган.

1967 йилда у қамоқхонадан қочишга муваффақ бўлган ва 12 кун давомида эркинликда юрган. 1975 йилда эса Смит шартли равишда озодликка чиқарилган. Аммо тахминан 10 ой ўтиб, ўғрилик ва ноқонуний қурол сақлашда айбланиб, яна қамоққа қайтарилган.

Қамоқхонада унга қандай лақаб берилган?

Осборн қамоқхонасида Смитга “осборнлик қушбоқар” деган лақаб берилган. Сабаби, у кийимига нон яшириб, қамоқхона ҳудудида қушларни боқиб юрган. Қамоқхона қўриқчилари бу одатидан хабардор бўлган ва унга кўз юмган.

Смит фақат 2020 йилдагина қамоқхонадан чиқарилган. Бироқ шундан кейин ҳам қариялар уйида назорат остида яшашда давом этган.

Френсис Клиффорд Смит 2026 йил июнь ойининг охирида ухлаб ётган вақтида 101 ёшида табиий сабаблар билан вафот этди. Унинг ҳаёти АҚШдаги энг узоқ муддат қамоқда қолган маҳбуслардан бири сифатида тарихда қолди.