Мағлубиятдан кейин Неймарнинг асаблари дош бермади: «У менга картошка берди»

«ПСЖ» юлдузи Неймар яна бир можарога ўралашиб қолди. Бу сафар ўз қўли билан.

Нима рўй берди?
«ПСЖ» шанба оқшомида Франция Кубоги финалида сенсацион равишда «Ренн»га ютқазиб қўйди (2:2, пенальтилар бўйича 5:6) ва сўнгги 5 йилда илк марта мазкур турнир финалида ютқазди. Неймар жамоасининг икки голида ҳам иштирок этди, аввалига Дани Алвесга ҳисобни очишда голли пас узатди, кўп ўтмай ўзи ҳисобни 2:0 кўринишига келтирди, аммо «Ренн» ўйин охирига қадар ҳисобни тенглаштириб, ўйинни овертаймларга олиб ўтди ва якунда пенальтилар сериясида омадлироқ чиқди.

Француз нашрлари Неймар бу ўйинда самарадорлик кўрсатган бўлса-да (у пенальтилар сериясида ҳам бешинчи бўлиб нуқтага келди ва аниқ ҳаракат қилди, аммо ундан кейин тўп тепган Нкункунинг хатоси жамоа мағлубиятига сабаб бўлди), уни ўз даражасида ўйнай олмасликда айбламоқда. У ёки жароҳатидан тўлиқ тузала олмаган ёки шу йил июнида Бразилия мезбонлигида ўтказиладиган Америка Кубогига (Копа Америка) куч тежамоқда.

«ПСЖ» футболчилари кумуш медалларни олиш учун трибунага кўтарилаётган вақтда Неймар мухлислардан бири олдида тўхтади ва ўзига тутилган камерани қўли билан ёпди, кейин эса фанатнинг жағига мушт туширди. Бразилиялик футболчи йўлида давом этди, унинг ортидан келаётган Мусса Диаби фанатга ва унинг шеригига қандайдир жавоб қайтаришга йўл қўймади.

Neymar met une pêche à un rennais pic.twitter.com/uXgU3R2l5Y
— Claude vaillant (@vaillant92100) April 27, 2019

Видеода кўриш мумкинки, мухлислар ёнида бир кичик бола ҳам бўлган ва у сал қолса Неймарнинг ҳаракатларидан жабр кўрган бўларди.

Фанатнинг ўзи нима деди?
Бу фанат фақатгина Неймарга эътирозларини билдирмаган. Неймардан олдинда юрган Жанлуижи Буффон, Марко Верратти ва Левен Курзава ҳам ундан турли камситиш сўзларини эшитган, аммо улар бунга эътибор қилмасдан йўлда давом этишган.

Фанат бу воқеадан у қадар қаттиқ хафа бўлмаган. У кўп ўтмай инстаграмдаги саҳифасига ўзининг телефонида олинган видеони жойлаштирди ва унга киноя билан шундай изоҳ қолдирди: «Менга картошка берган Неймар». Бу ибора Европа лаҳжасида «мени урган» маъносида ишлатилади.

Je crois Neymar il a vraiment pris le seum ? pic.twitter.com/flLraf5BZO
— Jk?? (@JeanAthimon) April 27, 2019

Реакция
Қайд этиш керакки, бу Неймар ҳақида кейинги кунлардаги навбатдаги можароли хабар бўлмоқда. Бироз олдин бразилиялик футболчи УЕФА томонидан еврокубоклардаги уч ўйиндан дисквалификация қилинганди. Бунга у март ойи бошида «ПСЖ»нинг «МЮ»га қарши Париждаги ЕЧЛ нимчорак финали доирасидаги жавоб ўйинидан кейин ҳакам шаънига ҳақоратли сўзларни айтгани сабаб бўлганди. Француз нашрларида ёзилишича, кубок финалидан кейинги ҳаракатлари учун у яна жазоланиши мумкин - бу сафар ички турнирлардаги ўйинлардан дисквалификация бўлиши кутилмоқда.

Неймарнинг ўзи бу эпизодга изоҳ бермади. Лекин у ўйиндан кейин «ПСЖ»нинг ёш футболчиларига қаратилган эътирозларини билдириб ўтди ва уларни тажрибали футболчилар ва мураббийларнинг сўзларини тингламасликда айблади. У эҳтимол «Ренн»га қарши ўйин давомида қизил карточка олган 20 ёшли Мбаппени, эҳтимол автогол урган Кимпембени, эҳтимол пенальтини тепа олмаган Нкункуни, балки уларнинг барчасини назарда тутган.

«Биз яхлит бир жамоа бўлишимиз керак. Ёш футболчилар кам гапириб, кўп эшитгани яхши. Улар тажрибали футболчилар ёки ҳатто мураббий нима ҳақдадир тушунтириш бера бошласа, норози бўлишади. Бунақада биз ҳеч нарсага эриша олмаймиз. Тажрибани ҳурмат қилиш керак, мен ёшлигимда шундай қилганман», деди у.

Манба: Kun.uz