Япония ўзбекистонлик талабаларга виза беришдан олдин текширувни кучайтирмоқчи

Виза талабларига амал қилмаётганлар сони кескин ошиб бораётганлиги сабабли, Япон ҳукумати Японияда ўқишни хоҳловчи Ўзбекистон фуқароларига виза беришдан олдин амалга оширилувчи текширувни кучайтирмоқда.

Сабаби нима?
Афсуски, Японияда таҳсил олаётган кўпгина хорижликлар ўқиши якунланиб, ўқиш учун берилган виза муддати тугагандан кейин ҳам Япониядан чиқиб кетмайди – ноқонуний қолиб, ишлаб юришга уринишади. Ноқонуний қолиб ишлаётгани маълум бўлган хорижликларга нисбатан Япониядан депорт қилишгача бўлган чоралар қўлланилади.

Бундай уринишларни амалга оширувчи хорижликлар орасида ўзбекистонликлар ҳам бор. Мазкур чора Японияда ноқонуний қолувчилар сонини қисқартириш мақсадида амалга оширилмоқда.

Япония ҳукумати бундай чорани охирги марта қачон қўллаган?
Айтиш жоизки, Японияда ишчи кучи етишмайди. Хорижликлар, жумладан хорижлик талабалар Японияда етишмаётган ишчи кучининг ўрнини анчагина тўлдириб туради. Жумладан, Японияда таҳсил олаётган хорижлик талабаларга ҳафтасига 28 соат ишлаши учун қонунан рухсат берилган.

Ишчи кучи етишмаслиги муаммосига қарамай, виза муддати тугагач мамлакатда ноқонуний қолаётганлар сони кескин ошиши Япония иммиграция хизматлари агентлигини қатъий чора кўришга мажбур қилган.

Агентлик хорижлик талабаларга виза беришдаги текширувчи кучайтириш чорасини охирги марта бундан 30 йил олдин қўллаган. Ҳозирда Японияда ўқишни хоҳловчи 7 мамлакат фуқароларига виза беришда кучайтирилган текширув амал қилади. Бу мамлакатлар –Хитой, Ветнам, Непал, Шри-Ланка, Мянма, Бангладеш ва Мўғулистон.

Бу сафар нечта мамлакат фуқаролари учун чора кўрилиши режалаштирилган?
Бу сафар жами 80 та давлат фуқароларига ўқиш учун виза беришдан олдин кучайтирилган текширувни қўллаш назарда тутилган. Улар орасида Ўзбекистон ҳам мавжуд. Эътиборга молик жиҳати шундаки, бундай давлатлар орасидан Хитойни чиқариб ташлаш режалаштирилган.

Кучайтирилган текширув қачондан амал қила бошлайди?
80 мамлакат фуқаролари учун кучайтирилган текширув 2020-йилнинг апрелидан бошлаб амал қила бошлайди. Унгача ушбу мамлакат фуқаролари одатий текширувдан ўтказилади.

Давлатлар рўйхати нимага асосланиб тузилган?
Агентлик иқтисодий ҳолати нисбатан яхши бўлган давлатлар рўйхатини шакллантирган. Бу рўйхатдан 118 мамлакат жой олган. Иқтисодий ҳолат яхшироқ давлатлар фуқароларининг ноқонуний қолиб ишлаш эҳтимоли кам эканлиги ҳисобга олинган.

80 та мамлакат эса иқтисодий ҳолати у қадар яхши бўлмаган давлатлар рўйхатидан жой олган. Мазкур мамлакатлар фуқароларининг ноқонуний қолиб ишлаш эҳтимоли юқори бўлганлиги сабабли, уларга нисбатан кучайтирилган текширув жорий қилинмоқда. Ноқонуний қолувчилар сони ҳам ҳисобга олинган, албатта.

Текширув қийинлашади дегани нима?
Бу дегани визага номзоддан қўшимча ҳужжатлар талаб қилинади.
Масалан, ҳозирда кучайтирилган текширув амал қилувчи 7 мамлакат фуқаролари, бошқа давлат талабаларидан фарқли равишда, виза учун Агентликка ариза топширишда қуйидаги қўшимча ҳужжатларни ҳам тақдим қилиши лозим:

1. Энг охирги таълим босқичида олинган диплом/сертификат.
2. Талаба Японияда ўқиётган пайти уни иқтисодий таъминлаб турувчи ватанидаги қариндошларининг банк ҳисоб рақамларидаги суммалар.
3. Талабанинг ота-онаси/қариндошларига қариндошлик алоқаси билан боғланганини исботловчи ҳужжат.

Шундай қилиб, жорий йилнинг апрелидан бошлаб Японияда ўқишни хоҳловчи ватандошларимиз учун виза олиш янада қийинлашади.
P.S. Ватандошларимиз қайси давлатда боришдан қатъий назар, виза ва бошқа масалаларга оид қонунчиликка амал қилишларини сўраб қоламиз. “Замин” янгиликларини “Telegram”да кузатиб боринг