Трамп КХДРга қарши санкцияларни узайтирди

^{Фото: Global Look Press}
АҚШ Шимолий Кореяга нисбатан қўлланилган санкциялар муддатини узайтирди. Президент Дональд Трамп мазкур чора юзасидан фармойишни имзолаган. Ҳужжат Оқ уйнинг расмий сайтига жойлаштирилган.

«Корея яриморолида хавфли, дунёга таҳдид қиладиган қуроллар яратиш учун шароит борлиги, шунингдек, мамлакат ҳукуматининг сиёсати ва ҳаракатлари АҚШ ташқи сиёсати, иқтисодиёти, миллий хавфсизликка фавқулодда хавф солаётгани туфайли Шимолий Кореяга нисбатан миллий фавқулодда ҳолат режими яна бир йилга узайтирилсин», — дейилган ҳужжатда.

АҚШ КХДРга қарши санкциялар муддатини аввал ҳам бир неча марта узайтирган. Чекловларда биринчи навбатда иқтисодий тақиқлар – ҳисоб рақамларини блоклаш, мамлакат билан транзакцияларни тўхтатиш кўзда тутилади. Аввал санкциялар 2020 йил 26 июнгача узайтирилганди.

Корея яриморолини ядросизлантириш бўйича АҚШ ҳамда КХДР ўртасидаги музокаралар 2018 йилда бошланган. Шу йили июнь ойида Сингапурда Трамп ҳамда Ким Чен Ин иштирокидаги биринчи саммит ўтказилганди, Вашингтон хавфсизлик ва санкцияларни бекор қилишга тайёрлигини билдирган. Аммо 2019 йил июнь ойида АҚШ КХДРга қарши санкцияларни яна узайтирди, шу йили август ойида рўйхат яна кенгайди ва унга икки нафар жисмоний шахс ҳамда учта компания киритилди.

2020 йил бошида Шимолий Корея етакчиси Ким Чен Ин КХДРнинг янги стратегик қуролини намойиш қилиши ҳақида гапирган. Унинг айтишича Вашингтон КХДРга қарши душманлик сиёсатидан воз кечмаса, Пхенян «бошқа йўл»ни танлайди ва стратегик қурол ишлаб чиқишда давом этади.

21 январда Шимолий Корея ядро синовларини тўхтатиш бўйича тақиққа бўйсунмади ва буни АҚШ ҳукумати томонидан қатъий ва инсонийликка зид санкциялар қўлланилаётгани билан изоҳлади.

«Биз фақат бир томон бўйсунадиган ва бошқа тараф риоя қилмайдиган мажбуриятларни бажаришдан маъно кўрмаяпмиз» — деган Женевадаги БМТ бўлинмаси КХДРнинг доимий вакиллиги маслаҳатчиси Чжу Ён Чхоль.

Манба: Daryo.uz “Замин” янгиликларини “Facebook”да кузатиб боринг