07:35 / 11.02.2021
810

Байден Трамп ва Путин суҳбатларининг яширин тафсилотларини билишни хоҳламоқда

Байден Трамп ва Путин суҳбатларининг яширин тафсилотларини билишни хоҳламоқда
АҚШ президенти Жо Байден ўзидан олдинги давлат раҳбари Дональд Трампнинг Россия етакчиси Владимир Путин билан суҳбатларининг яширин тафсилотлари ҳақида билишни истамоқда. Бу ҳақда "Politico" нашри ўз манбаларига таяниб хабар бермоқда.

Қайд этилишича, Оқ уйнинг собиқ эгаси Путин билан суҳбатларининг тафсилотларини атрофдагилар билан бўлишмаган. Шу боис Трамп ва Путин ўртасидаги ўнга яқин музокараларнинг деталлари сир бўлиб қолмоқда.

Амалдаги президент маслаҳатчилари республикачи (Доналд Трамп) бирор махфий ахборотни ошкор қилганми ёки Россия президенти билан янги маъмуриятни танг аҳволга соладиган бирор махфий битим тузганми, деган саволга аниқлик киритишмоқчи.

«Бу [ёзувлар] билан танишиш учун бизнинг рухсатимиз керак эмас. Суҳбатдаги барча материаллар Байденга тегишли», дейди Трамп даврида Оқ уйда хизмат қилган собиқ ходимлардан бири.

Нашрга кўра, Трамп чет эл раҳбарлари билан шахсий суҳбатларининг тафсилотларини қатъий сир тутган ва маълумотлар ошкор қилинмаслиги учун бор имкониятларини ишга солган.

Бироқ таъкидланишича, собиқ АҚШ раҳбари Путинга камдан-кам ҳолларда у илгари ошкора айтмаган сўзларини айтган.

Собиқ амалдорлардан бирининг сўзларига кўра, Трамп ва Путиннинг суҳбатларини тинглаш кўпинча «барда гурунглашаётган икки дўстни тинглаш каби туюлган», дейди Трампнинг кўплаб қўнғироқлари ва Путин билан учрашувларини таржима қилган Марина Гросс.

Манбага кўра, қўнғироқлар ёзиб олинмаган. Бироқ президентнинг баъзи ёрдамчилари музокараларни тинглашган ва суҳбат тафсилотларини ёзиб олишган. Ушбу маълумотлар АҚШ Миллий архивига топширилган, уларни Байден маъмурияти бемалол олиши мумкин.
Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)