Хитойлик 14 ёшли Олимпиада чемпионининг оиласи 30 млн фунт стерлинг миқдоридаги мукофотдан воз кечди

^{Фото: Getty Images}
Токиодаги Олимпиада ўйинларида 10 метр баландликдан сувга сакраш бўйича олтин медални қўлга киритган Цюан Хунчаннинг оиласи мукофот тариқасида таклиф қилинган пуллардан воз кечди, деб ёзади Mirror.

14 ёшли спортчи қизнинг оиласига уй ва катта маблағ таклиф қилинганди. Хабарларга кўра, мукофотларнинг умумий миқдори 30 миллион фунт стерлингни ташкил қилган. Аммо Хунчаннинг оиласи мукофотларни олишдан воз кечган.

Хунчан олтин медални қўлга киритганидан сўнг тўрт йил аввал автоҳалокатга учраган онасига ёрдам бериш учун пул топмоқчи эканлигини айтганди.

Қизалоқ Гуандун провинциясида туғилган бўлиб, отаси фермерлик билан шуғулланади. Спортчи қизнинг интервьюсидан сўнг Чжанцзян шаҳридаги шифохона унинг онаси ва бемор бобосига тўлиқ тиббий хизмат кўрсатишни таклиф қилган.

The Global Times нашрининг ёзишича, шаҳардаги учта корхона унга уй, дўкон, бутун оила аъзоларига кўнгилочар парклар, зоопарк ва курортларга бориш учун бир умрлик бепул чипталар таклиф қилган.

Аммо чемпион қизнинг отаси Вэнмао барча таклифларни рад этган. «Бизга таклиф билан чиққан барча ташкилотларга раҳмат айтаман. Аммо бир чақа ҳам олмайман», — деган у.

Олимпиада ўйинлари натижасига кўра, Хитой 38 олтин, 32 кумуш ва 18 бронза медали билан умумжамоа ҳисобида иккинчи ўринни эгаллади. “Замин” янгиликларини “Telegram”да кузатиб боринг