Назарбоевлар оиласи аъзоларининг истеъфолари. Улар ҳозир қаерда?

17 январь куни Қозоғистоннинг биринчи президенти Нурсултон Назарбоев оиласининг яна икки аъзоси “ўз ихтиёри билан” истеъфога чиқди.
Назарбоев ҳукмронлиги даврида ва истеъфога чиққанидан кейин унинг қариндошлари йирик корпорациялар ва давлат органларида юқори лавозимларда ишлаб келди. Январь норозиликларидан кейин улар аста-секин ўз позицияларини йўқотмоқда.

Нурсултон Назарбоев Қозоғистонни 30 йилдан ортиқ бошқарди. 2019 йилда истеъфога чиққанидан кейин Қозоғистон Хавфсизлик кенгаши раҳбари лавозимини ўзида сақлаб қолди.

Расмий равишда Назарбоев бу лавозимда умрбод қолиши мумкин эди. Аммо 5 январь куни лавозимдан четлаштирилгани маълум бўлди (бошқа версияга кўра, у ўз хоҳиши билан бўшаган). Ҳозирда Хавфсизлик кенгашига президент Тоқаев бошчилик қилмоқда.

11 январь куни Қозоғистон президенти Қосим-Жомарт Тўқаев мамлакатда “жуда даромадли компаниялар ва жуда бадавлат одамлар қатлами” борлигини, улар энди “Қозоғистон халқига” хайрия жамғармасига мунтазам ҳисса қўшиш орқали халққа ёрдам бериши кераклигини айтди.

Назарбоевнинг қизлари ва куёвлари
Дариға Назарбоева Қозоғистон биринчи президентининг тўнғич қизи. 2014 йилдан буён мамлакат парламентида ишлаб, 2019 йилдан парламентнинг юқори палатасини бошқариб келмоқда. 2020 йилнинг май ойида президент Тоқаев унинг сенаторлик ваколатларини муддатидан олдин тугатди. Кейинроқ Дариға Назарбоева парламент қуйи палатасига депутат этиб сайланди. Аммо 12 январдан бери у йиғилишларда кўринмаяпти. Парламент матбуот хизмати Дариғанинг коронавирусга чалингани ва касаллик таътилига чиққани ҳақида хабар берди.

Маҳаллий матбуотнинг ёзишича, Назарбоева 2020 йилда Қайрат Шарипбоевга турмушга чиққан. Ўша йили Шарипбоев "Қозоқгаз" компанияси бошқаруви раиси бўлди. 15 январь куни эса бу лавозимдан четлаштирилди.

Элбошининг ўртанча қизи Динара Кулибоева тадбиркорлик ва ижтимоий фаолият билан шуғулланади. Унинг турмуш ўртоғи Тимур Кулибоев Forbes талқини бўйича Қозоғистоннинг энг нуфузли тадбиркорлари рейтингида биринчи ўринни эгаллаган. Охирги саккиз йил давомида у “Атамекен” миллий тадбиркорлар палатасини бошқарди. 17 январь куни ташкилот Кулибоев “ўз ихтиёри билан истеъфога чиққани” ҳақида хабар берди. Ҳозирча у Қозоғистон Олимпия қўмитаси раҳбари лавозимини сақлаб қолмоқда.

Нурсултон Назарбоевнинг кенжа қизи Алия Назарбоева ижтимоий фаолият билан шуғулланади ва санъат соҳасида ҳам фаолият юритади. Алиянинг турмуш ўртоғи Димаш Дўсанов тўйдан кўп ўтмай "ҚазТрансОйл" компанияси бошқаруви раиси лавозимини эгаллаган. У ҳам 15 январда лавозимидан айрилди.

Қариндошлар ва яқинлар
Нурсултон Назарбоевнинг жияни Самат Абишев Қозоғистон Миллий хавфсизлик қўмитаси раисининг биринчи ўринбосари бўлиб ишлаган. 7 январь куни унинг истеъфога чиққани ҳақида хабар берилди.

Карим Масимов Назарбоевнинг ишончли одами саналган. Улар узоқ йиллар бирга ишлади. Назарбоев президентликдан кетганидан сўнг Масимов Қозоғистон Миллий хавфсизлик қўмитасини бошқарди. 6 январда, мамлакатдаги норозилик намойишларининг тўртинчи куни у ҳибсга олинди ва давлатга хиёнатда айбланди.

Каримнинг укаси Нурлан Масимов яқин-яқингача Павлодар вилояти милициясини бошқарган. 17 январь куни у ҳам истеъфога чиққанини маълум қилди.

Нурсултон Назарбоев ва унинг фарзандлари ҳозир қаерда экани номаълум. Декабрь ойининг охиридан бери улар омма олдида кўриниш бергани йўқ. Уларнинг вакилларига кўра, Нурсултон Назарбоев пойтахтда, тўнғич қизи Дариға эса Олмаотада.

Назарбоевнинг кенжа қизи норозилик намойишлари чоғида Инстаграмда бу ҳақда бир неча пост қолдирди. У постларни Бирлашган Араб Амирликларида туриб жойлагани маълум бўлди. Орадан кўп ўтмай Алия Назарбоева Фейсбук ва Инстаграмдаги аккаунтларини ўчириб ташлади.

Маълумки, Дариға ва Алия Назарбоевалар аввалроқ Лондондан уй сотиб олган. Дариға ва унинг ўғли Нуралига тегишли мулк 2019 йилда 100 миллион доллардан ортиққа баҳоланган.

Алиянинг уйининг баҳоси эса 10 миллион доллардан ошади. Шунингдек, у Дубайда тахминан 14 миллион долларга кўчмас мулк сотиб олган. “Замин” янгиликларини “Twitter”да кузатиб боринг