Россияда ишсизлик даражаси икки бараварга ошиши мумкин

^{Фото: The New York Times}
Россияда 2022 йил якунлари бўйича ишсизлик биринчи чоракдагига нисбатан икки баравардан кўпроққа ошиши мумкин. Бу ҳақда Bloomberg агентлиги таҳлилчилар фикрига таяниб хабар берди.

Уларнинг тахминига кўра, мамлакатда ишсизлик даражаси 9 фоиздан ошиб, ўн йил давомидаги энг юқори кўрсаткичга етади.

«Бу Россияда ислоҳотлар бошланган ва заводлар ёпилган 90-йиллар бошларини эслатади», — деган олий иқтисодиёт мактаби профессори, иқтисодиёт фанлари доктори Евгений Гонтмахер агентлик билан суҳбатда.

Қайд этилишича, компаниялар оммавий ишдан бўшатишлар ўрнига маошларни қисқартириши, ходимларни тўлиқсиз иш кунига ўтказиши ёки ҳақ тўланмайдиган таътилга чиқариши мумкин.

Март ойида янги вакансиялар сони февралдагига нисбатан 20 фоизга камайган, энг кескин пасайишлар Москва ва Санкт-Петербургга тўғри келади, деб ёзади Bloomberg.

Янгиликлар