Бугунги кунда болаларда компьютер, телефон ёки планшет ўйинларига қарамлик тобора кенг тарқалмоқда. Бу ҳолат боланинг вақтини назоратсиз ўйинларга сарфлаши, мактабдаги ўқиш, жисмоний фаолият ва оилавий мулоқотдан четда қолишига олиб келади. Асосий сабаблар — ота-онанинг назорати етарли бўлмаслиги, бўш вақтни самарали ташкил этмаслик ва ўйинларнинг болани тез жалб этадиган механизмларидир.
Ўйинга қарамлик белгилари — боланинг ўйин вақтини яширишга уриниши, бошқа машғулотларга қизиқмаслиги, ўйин тўхтатилганда асабийлашиши ва уйқу режими бузилиши. Бундай ҳолат узоқ давом этса, ақлий ривожланиш, диққат ва хотира саломатлигига салбий таъсир кўрсатиши мумкин.
Қутулиш учун, аввало, ота-она ўйин вақтини қатъий белгилаши, боланинг қизиқишларини спорт, санъат ёки бошқа фойдали машғулотларга йўналтириши лозим. Оилавий биргаликдаги фаолиятлар, тоза ҳавода сайр ва жамоавий ўйинлар қарамликни камайтиради. Энг муҳими, ота-она ўз фарзандига яхши намуна бўлиб, гаджетлардан меъёрида фойдаланиши керак.
«Замин»ни Telegram’да ўқинг!
