Ўзбекистон ва Туркия ўртасида юклар ташишда энг тез ва қулай йўналишлардан бири очилди

^{Фото: «Ўзбекистон темир йўллари» матбуот хизмати}
3 декабрь кун Тошкентга Туркиядан Ўзбекистонга илк юк поезди етиб келди, деб хабар бермоқда «Ўзбекистон темир йўллари» матбуот хизмати.

2022 йилнинг ноябрида Самарқандда бўлиб ўтган Туркий давлатлар ташкилоти президентларининг саммити доирасида янги транспорт транзит коридорларини йўлга қўйиш ва ривожлантириш бўйича келишувга эришилган эди. Ушбу келишув самараси ўлароқ Тошкентга Туркиянинг Измир шаҳридаги «Гумруҳ» станциясидан 40 та вагондан иборат биринчи юк поезди етиб келган.

Қайд этилишича, ушбу поезд Туркия—Эрон—Туркманистон—Ўзбекистон йўналишида дастлабки юк поезди ҳисобланади. Ҳозирда ушбу йўналиш бўйича яна 250 дан ортиқ вагон келиши режалаштирилган.

«Ушбу йўналиш катта ривожланиш салоҳиятига эга бўлиб, Ўзбекистон юкларини халқаро йўналишларда ташиш учун қўшимча йўналиш ҳисобланади ва юртимиз тадбиркорлари учун Ўзбекистондан Туркияга экспорт юкларини жўнатишда ҳамда импорт юкларини олиб келишда энг тез ва қулай йўналишлардан биридир», — дейилади хабарда.

^{Фото: «Ўзбекистон темир йўллари» матбуот хизмати}
Давлат томонидан амалга оширилаётган бу каби чора-тадбирлар минтақадаги мавжуд транспорт-коммуникация тармоқлари ва инфратузилмасидан самарали фойдаланишга, шунингдек, ташқи савдо юкларини асосий жаҳон ва минтақавий бозорларга ташиш учун вақт ва молиявий харажатларни сезиларли даражада камайтиришга имкон беради. “Замин” янгиликларини “Facebook”да кузатиб боринг