Ўзбек асали дунёга очилмоқда: АҚШ, Хитой ва Россияга экспорт кенгаймоқда

Ўзбекистон асалчилари сўнгги йилларда халқаро бозорда ўз ўрнини мустаҳкамлашда давом этмоқда. Ветеринария ва чорвачиликни ривожлантириш давлат қўмитаси маълумотларига кўра, 2024 йил бошидан 2025 йилнинг тўрт ойигача бўлган давр мобайнида юртимиз 206 минг долларлик 64 тонна асални экспорт қилди.

АҚШ ва Афғонистон — асосий харидорлар

Экспорт қилинган асалнинг қарийб 92 фоизи АҚШга етказиб берилган. Қўшимча равишда 7 фоиз асал Афғонистон бозорига жўнатилган. Эътиборли жиҳати, 2025 йилда илк бор Хитойга ҳам асал экспорт қилиш йўлга қўйилди — бу янги бозорларга чиқиш йўлида муҳим қадам сифатида қайд этилмоқда.

Асалари пакетлари — янги экспорт хити

Фақат асал эмас — Ўзбекистон асаларичилари асалари пакетлари савдосини ҳам жадаллаштирмоқда. 2024 йил бошидан 2025 йилнинг тўрт ойигача бўлган муддатда 5 миллион АҚШ доллари миқдорида 260 минг дона асалари пакетлари хорижий бозорларга етказилган.

Бу маҳсулотлар асосан Россия, Қозоғистон ва Арманистон каби мамлакатларга экспорт қилинган бўлса, бу йил экспорт географиясига Тожикистон ҳам қўшилди.

Қувонарли томони, асалари пакетлари экспорти ўтган йилнинг шу даврига нисбатан 1,5 бараварга ўсди.

Zamin.uz таҳририятидан:
Ўзбекистон асал бозоридаги бундай ижобий ўзгаришлар қишлоқ хўжалиги соҳасининг экспортбоп салоҳияти янада юксалаётганини кўрсатмоқда. Асал ҳамда асалари маҳсулотларига бўлган халқаро талаб фонида маҳаллий ишлаб чиқарувчилар учун янги имкониятлар эшиги очилаётир.

Сиз бу борада қандай фикрдасиз? Асал экспорт салоҳияти яна қайси бозорларда ўсиши мумкин? «Замин»ни Telegram’да ўқинг!