Иқтисодиёт ва молия вазирлиги эълон қилган 2026–2028 йилларга мўлжалланган Бюджетнома бўйича келаси йилдан якка тартибдаги тадбиркорлар ва ўзини ўзи банд қилган шахслар учун муҳим солиқ ўзгаришлари амалга киритилади. 2026 йил 1 январдан бошлаб улар учун солиқ тўлашнинг янги механизми жорий этилади.
Янги тартибга кўра, йиллик айланмаси бир миллиард сўмгача бўлган якка тартибдаги тадбиркорлар ва фриланс тарзда иш юритувчи ўзини ўзи банд қилган шахслар айланмадан 1 фоиз миқдорида солиқ тўлайди. Бу тизимнинг жорий этилиши солиқ юкини шаффофлаштириш, тадбиркорлар учун бир хил қоидаларни ўрнатиш ва бизнес юритишни енгиллаштиришга қаратилган.
Шу муносабат билан амалда бўлиб келган бир қатор тартиблар бекор қилинади:
• якка тартибдаги тадбиркорлар учун қатъий белгиланган миқдорда жисмоний шахслар даромад солиғини тўлаш мажбурияти тугатилади;
• йиллик тушуми 100 миллион сўмдан ошмаган ўзини ўзи банд қилган шахсларни айланма солиғидан озод этиш амалиёти бекор қилинади.
Тадбиркорлик фаолиятининг ўсиши ва ривожланишини рағбатлантириш учун ушбу ўзгаришлар бизнес юритувчиларга тенг имконият яратиш, улар учун ички қонунчиликни соддалаштириш ва янги енгилликлар бериш мақсадида амалга оширилаётгани таъкидланди.
Янги солиқ тартиби кичик бизнес учун барқарор ва аниқ қонунчилик муҳитини шакллантириши, мулкдорлар ва тадбиркорлар фаолиятини янада қонунийлаштириши ҳамда иқтисодий фаолликни рағбатлантириши кутилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
