Бугун АҚШнинг Товар фючерслари савдоси бўйича комиссияси (КФТК) тарихий қарор қабул қилиб, рўйхатдан ўтган биржаларда ҳақиқий Bitcoin перпетуал (муддатсиз) шартномаларини жойлаштиришга рухсат берди. Бу қадам крипто активлар бозорининг энг ликвид сегментларидан бирини АҚШ тартибга солиш доирасига олиб кириш учун йўл очди. Мамлакатда бундай шартномаларнинг пайдо бўлиши АҚШни дунёнинг крипто пойтахтига айлантириш йўлидаги муҳим босқичдир. Бу ҳақда Coindesk.com хабар беради.
Анъанавий фючерслардан фарқли ўлароқ, перпетуал шартномаларнинг амал қилиш муддати чекланмаган. Улар 24/7 режимида ишлайдиган бозорлар учун мўлжалланган бўлиб, иштирокчиларга шартномаларни доимий равишда янгилаш (ролл-овер) харажатларисиз ўз позицияларини сақлаб қолиш имконини беради. Ушбу восита илк бор 1992-йилда Нобел мукофоти совриндори Роберт Шиллер томонидан таклиф этилган ва ҳозирда глобал крипто бозорида рискларни бошқаришнинг асосий воситасига айланган.
Шу вақтга қадар КФТК томонидан аниқ ҳуқуқий механизм яратилмагани сабабли, перпетуал савдолари асосан оффшор ҳудудларда амалга оширилар эди. Бу эса Америка крипто компанияларининг рақобатбардошлигини пасайтириб, маҳаллий инвесторларнинг ушбу бозорга киришини чеклаб келаётган эди. Янги ёндашув эса инновацияларни қўллаб-қувватлаш ва тартибга солиш орқали бозорда шаффофликни таъминлашни кўзда тутади.
Комиссиянинг ушбу қарори ҳаддан ташқари левераж, волатиллик ва тизимли рискларни чеклашга хизмат қилувчи ишчи механизмни тақдим этади. Бу рискларни тартибга солинмайдиган оффшор майдонларга чиқариб юборишдан кўра, уларни Америка назорати остида ушлаб туриш афзалроқ деб топилди. Bitcoin перпетуал шартномаларининг маъқулланиши АҚШнинг рақамли молия технологиялари соҳасидаги етакчилигини янада мустаҳкамлайди.
“Zamin”ни Telegram'да ўқинг!
